دل مبتلائے لذت آزار ہی رہا | داغ دہلوی |
دل مبتلائے لذت آزار ہی رہا
مرنا فراقِ یار میں دشوار ہی رہا
احسان عفو جرم سے وہ شرمسار ہوں
بخشا گیا میں تو بھی گنہ گار ہی رہا
ہوتی ہیں ہر طرح سے مری پاسداریاں
دشمن کے پاس بھی وہ مرا یار ہی رہا
دن پہلوؤں سے ٹال دیا کچھ نہ کہہ سکے
ہر چند ان کو وصل کا انکار ہی رہا
دیکھیں ہزار رشکِ مسیحا کی صورتیں
اچھا رہا جو عشق کا بیمار ہی رہا
لذت وفا میں ہے نہ کسی کی جفا میں ہے
دل دار ہی رہا نہ دل آزار ہی رہا
جلوہ کے بعد وصل کی خواہش ضرور تھی
وہ کیا رہا جو عاشقِ دیدار ہی رہا
کہتے ہیں جل کے غیر محبت سے داغؔ کی
معشوق اس کے پاس وفادار ہی رہا
شاعر: داغ دہلوی
(آفتابِ داغ :سال اشاعت،1923)
Dil Mubtala-e-Lazzat Azaar Hi Raha
Marna Firaaq-e-Yaar Men Dushwaar Hi Raha
Ehsaan Afw Jurm Say Wo Sharmsaar Hun
Bakhsa Gaya Main To Bhi Gunehgaar Hi Raha
Hoti Hen Har Tarah Say Meri Paasdariyaan
Dushman K Paas Bhi Wo Mira Yaar Hi Raha
Din Paehluon Say Taal Diya Kuchh Na Keh Sakay
Harchand Un Ko Wasl Ka Iqraar Hi Raha
Dekhen Hazaar Rashk-e-Maseeha Ki Soorten
Acha Raha Jo Eshq Ka Bemaar Hi Raha
Lazzat Wafa Men Hay Na Kisi Ki Jafaa Men Hay
Dildaar Hi Raha Na Dil Aazaar Hi Raha
Jalway K Baad Wasl Ki Khaahish Zaroor Thi
Wo Kaya Raha Jo Ashiq -e-Dedaar Hi Raha
Kehtay Hen Jal K Ghair Muhabbat Say DAGH Ki
Mashooq Uss K Paas Wafa Daar Hi Raha
Poet: Dagh Dehlvi