کورونا کے  کاری وار، پاکستان میں مزید 8 افراد جاں بحق، کیسز کتنے ہوگئے؟ اعداد و شمار سامنے آگئے

کورونا کے  کاری وار، پاکستان میں مزید 8 افراد جاں بحق، کیسز کتنے ہوگئے؟ اعداد ...
کورونا کے  کاری وار، پاکستان میں مزید 8 افراد جاں بحق، کیسز کتنے ہوگئے؟ اعداد و شمار سامنے آگئے

  

اسلام آباد (ڈیلی پاکستان آن لائن) پاکستان میں کورونا وائرس کے کیسز میں پریشان کن حد تک اضافہ ہوگیا۔

نیشنل کمانڈ اینڈ کنٹرول سنٹر کے مطابق گزشتہ 24 گھنٹوں کے دوران پاکستان میں کورونا وائرس کے 404 کیسز سامنے آئے ہیں جس کی وجہ سے کیسز کی مجموعی تعداد 15 ہزار 256 ہوگئی ہے۔ ایک دن کے دوران پاکستان میں کورونا کے  سبب 8 افراد جان کی بازی ہارے ہیں جس کی وجہ سے جاں بحق افراد کی مجموعی تعداد 15 ہزار 256 ہوگئی ہے۔ پاکستان میں 3 ہزار 425 افراد اب تک کورونا کی وبا سے صحتیاب ہوچکے ہیں ۔  حکومت کی جانب سے کورونا کی تشخیص کیلئے ٹیسٹوں کی رفتار میں بھی اضافہ کردیا گیا ہے ، ایک دن کے دوران پاکستان بھر میں 8 ہزار 530 لوگوں کے ٹیسٹ کیے گئے ہیں جس کے بعد پاکستان میں اب تک ہونے والے ٹیسٹوں کی مجموعی تعداد ایک لاکھ 65 ہزار 911 ہوگئی ہے۔

صوبوں کی صورتحال

پنجاب میں کورونا کے کیسز کی تعداد 5 ہزار 827 ہوچکی ہے۔ سندھ میں بھی کورونا کے کیسز تیزی سے بڑھتے جارہے ہیں جس کی وجہ سے سندھ اور پنجاب کا درمیانی فاصلہ انتہائی کم رہ گیا ہے۔ سندھ میں اب تک 5 ہزار 695 لوگوں میں کورونا وائرس کی تصدیق ہوچکی ہے۔ خیبر پختونخوا میں کورونا کے 2 ہزار 160، بلوچستان میں 915، گلگت بلتستان میں 330 ،  اسلام آباد میں 297 اور آزاد جموں و کشمیر میں کورونا وائرس کے 65 کیسز رپورٹ ہوچکے ہیں۔

عالمی صورتحال

کورونا کی وبا اب تک دنیا کے ہر کونے تک پھیل چکی ہے ، کوئی ملک ایسا نہیں جو اس وبا سے محفوظ رہا ہو۔ دنیا بھر میں اب تک کورونا سے متاثر ہونے والے افراد کی تعداد 31 لاکھ 63 ہزار 408 ہوچکی ہے جبکہ ہلاکتوں کی تعداد 2 لاکھ 19 ہزار 350 ہوچکی ہے۔ اب تک دنیا بھر میں 9 لاکھ 75 ہزار 972 افراد کورونا کی وبا سے جان چھڑانے میں کامیاب رہے ہیں۔

سب سے متاثرہ ممالک

دنیا میں کورونا کی وبا سے سب سے زیادہ متاثر امریکہ ہوا ہے جہاں 10 لاکھ 37 ہزار 151 افراد میں کورونا کی تصدیق ہوئی ہے۔ سپین میں 2 لاکھ 36 ہزار 899 ، اٹلی میں 2 لاکھ ایک ہزار 505، فرانس میں ایک لاکھ 65 ہزار 911، برطانیہ میں ایک لاکھ 61 ہزار 145، جرمنی میں ایک لاکھ 60 ہزار 479، ترکی میں ایک لاکھ 14 ہزار 653، روس میں 99 ہزار 399  اور ایران میں 93 ہزار 657 افراد میں کورونا وائرس کی تصدیق ہوئی ہے۔

سب سے زیادہ ہلاکتیں

کورونا کی وجہ سے سب سے زیادہ ہلاکتیں بھی امریکہ میں ہوئی ہیں جہاں اس وبا کی وجہ سے مرنے والوں کی تعداد 59 ہزار 329 تک پہنچ گئی ہے۔ اٹلی میں کورونا کی وجہ سے مرنے والوں کی تعداد 27 ہزار 359، سپین میں 24 ہزار 275، فرانس میں 23 ہزار 660 اور برطانیہ میں 21 ہزار 678 ہوچکی ہے۔

مزید :

قومی -علاقائی -اسلام آباد -کورونا وائرس -