پیراگوائے، پولیس کے پاس اصلی کے بجائے کھلونا رائفلیں

اسنسیون(آئی این پی )پیرا گوئے میں پولیس کے اسلحہ خانے میں 42 جدید رائفلوں کے بجائے وہاں کھلونا رائفلیں ملنے کا انکشاف ہوا ہے،اسلحہ خانے سے 42 جدید رائفلیں چوری کر کے پلاسٹک اور لکڑی سے بنی کھلونا رائفلیں رکھ دی گئیں۔ چوری شدہ رائفلیں ارجنٹینا اور برازیل اسمگل کردی گئیں۔ بین الاقوامی میڈیا کے مطابق پیراگوائے پولیس کے اسلحہ خانے میں 42 جدید رائفلوں کے بجائے وہاں کھلونا رائفلیں ملنے کا انکشاف ہوا ہے۔تفصیلات کے مطابق پیراگوائے پولیس کے اسلحہ خانے میں چھاپے کے دوران انکشاف ہوا کہ 42 جدید رائفلیں چوری ہوگئی ہیں اور ان کی جگہ پلاسٹک اور لکڑی سے بنی کھلونا رائفلیں موجود ہیں۔پولیس نے اسلحہ خانے پر چھاپہ اس وقت مارا جب انہیں رائفلوں کی بلیک مارکیٹنگ کے بارے میں پتہ چلا جہاں یہ رائفلیں دس ہزار ڈالر تک میں فروخت ہوئیں۔مقامی میڈیا کے مطابق پولیس کی چوری ہونے والی رائفلیں ارجنٹینا اور برازیل اسمگل کردی گئی ہیں۔پولیس حکام کا کہنا ہے کہ اسلحہ خانے کے انچارج کو تبدیل کردیا گیا ہے لیکن کوئی گرفتارئی عمل میں نہیں لائی گئی۔پیراگوائے کے خبررساں ادارے نے اسلحہ خانے میں موجود جعلی رائفلوں کی تصاویر جاری کرتے ہوئے اسے ملکی تاریخ کا شرمناک اسکینڈل قراردیا ہے۔دوسری جانب برازیل میں بڑے پیمانے پیراگوائے سے آنے والے غیرقانونی اسلحے کی کھیپ پکڑے جانے کی اطلاعات ملی ہیں۔واضح رہے کہ پیراگوائے میں پولیس کے لیے پرانے اسلحے کو تبدیل کرکے اب نیا اسلحہ خریدا جارہا ہے۔