بجٹ مسترد، پٹرولیم قیمتوں میں کمی کی جائے: متحدہ اپوزیشن، حزب اختلاف کی پریس کانفرنس جھوٹ کاپلندہ: شبلی فراز
اسلام آباد(سٹاف رپورٹر،مانیٹرنگ ڈیسک، نیوز ایجنسیاں) متحدہ اپوزیشن نے تحریک انصاف کی حکومت کا پیش کردہ وفاقی بجٹ مسترد کرتے ہوئے پٹرول کی قیمتوں میں اضافہ فوری واپس لینے کا مطالبہ کیا ہے۔متحدہ اپوزیشن کے رہنماوں نے اسلام آباد میں پریس کانفرنس میں وفاقی بجٹ کو مسترد کرتے ہوئے متفقہ حکمت عملی بنانے پر اتفاق رائے کا اعلان کیا۔پریس کانفرنس سے خطاب کرتے ہوئے بلاول بھٹو زرداری نے کہا کہ حزب اختلاف آج اپنا ایک مشترکہ بیان دے رہی ہے شہباز شریف، قومی وطن پارٹی، جماعت اسلامی، جے یوآئی اور دیگر اپوزیشن جماعتوں نے بجٹ کو مسترد کردیا ہے. اس بجٹ نے پورے پاکستان کو اس حکومت کے خلاف متحد کیا ہے. اپوزیشن جماعتوں نے مل کر اس بجٹ کو مسترد کیا ہے۔انہوں نے کہا کہ کہا ہم امید کررہے تھے کہ بجٹ میں معاشی صورتحال کے تحفظ کیلئے اقدامات کیے جائیں گے۔ لیکن اس مشکل صورتحال میں عوام پر ظلم کیا گیا ہے۔ پٹرولیم لیوی میں اضافے کا نوٹیفیکیشن جاری کرکے عوام کی جیب پر ڈاکہ ڈالا ہے. بجٹ پاس ہونے سے پہلے پٹرول کی قیمت سے بھی زیادہ ٹیکس لگا دیا ہے۔ انہوں نے مزید کہا کے شہباز شریف کے صحت یاب ہونے کے بعد کل جماعتی کانفرنس کے لائحہ عمل کا اعلان کریں گے۔مسلم لیگ ن کے رہنما اور رکن قومی اسمبلی خواجہ آصف نے کہا کہ اس مشکل صورتحال میں جب ملک میں وبا کا راج ہے اور یہ وبا ہزاروں جانیں لے چکی ہے.معیشت پہلے تباہ ہوچکی تھی وبانے اس کی بحالی کے دروزاے بند کردیے۔ ان حالات میں بجائے عوام کو ریلف دینے کے مزید ناقابل برداشت بوجھ ڈال دیا گیا ہے. مشیر خزانہ نے چار پانچ دن پہلے کہا کہ کوئی ایسی چیز ہمارے پروگرام میں نہیں اور بعد میں پٹرول بم گرادیا گیا۔ اس سے ناقابل برداشت مہنگائی کا بوجھ پڑے گا۔خواجہ آصف نے کہا کہ عمران خان کا عہدے پر قائم رہنا ہمیں تباہی کی طرف لے جارہا ہے. جتنی جلدی اس سے چھٹکارا پایا جائے تاکہ اس ملک کو بچایا جائے. حکومت کے اتحادیوں میں پھیلنے والی بے دلی سے ظاہر ہوتا ہے کہ ان کے رخصت ہونے کا وقت قریب ہے۔ حکومت اپنی انا کی تسکین کے لیے اداروں کو حزب اختلاف کے خلاف استعمال کیا جارہا ہے۔ انہوں نے کہا کہ میں سمجھتا ہوں ملک کو مسائل سے نکالنے کے لیے نئے مینڈیٹ کی ضرورت ہے۔ اس بجٹ کے خلاف عوام کو متحد کریں گے۔ حکومت سے چھٹکارا حاصل کرنے کے لیے ہرآئینی راستہ اختیار کریں گے۔جماعت اسلامی کے راہنما میاں محمد اسلم نے کہا کہ بجٹ الفاظ کا گورکھ دھندہ ہے تمام انڈیکیٹرز خیالی ہیں. سرکاری ملازمین کی تنخواہوں، پنشن میں اضافہ نہیں کیاگیا. تعلیم اور صحت کے بجٹ بالکل نہیں بڑھایا گیا شامل ہیں اکرم درانی نے کہا کہاس وقت پوری اپوزیشن ایک پیج پر ہیں. اس سے برا وقت اپنی زندگی میں کبھی نہیں دیکھا۔ اپوزیشن جماعتوں نے اس موقع پرحکومت کے خلاف متفقہ قرارداد منظور کی۔ یہ بھی فیصلہ کیا گیا کہ اپوزیشن کی آل پارٹیز کانفرنس اگلے ہفتے اسلام آباد میں بلائی جائے گی جس کی صدارت بلاول بھٹو کریں گے،اے پی سی میں تاخیر شہباز شریف کی طبیعت ناساز ہونے کی وجہ سے کی گئی ہے درٰں اثناپاکستان پیپلزپارٹی کے چیئرمین بلاول بھٹو زرداری نے جمہوری وطن پارٹی کے رہنما شاہ زین بگٹی کو فون کر کے 18ویں آئینی ترمیم پر ان کے مؤقف کو سراہا۔ چیئرمین بلاول بھٹو زرداری نے این ایف سی ایوارڈ سے متعلق مؤقف پر شاہزین بگٹی کی ستائش کی اور جمہوری اور عوامی بیانئیے کو اختیار کرنے پر شاہزین بگٹی سے اظہار تشکر کیا۔چیئرمین بلاول بھٹو زرداری اور جمہوری وطن پارٹی کے رہنما شاہزین بگٹی کے درمیان جلد ملاقات پر اتفاق کیا گیا۔
متحدہ اپوزیشن
اسلام آباد(سٹاف رپورٹر، مانیٹرنگ ڈیسک،آن لائن)وفاقی وزیر اطلاعات ونشریات سینیٹر شبلی فراز نے کہا ہے کہ اپوزیشن جماعتوں کی پریس کانفرنس جھوٹ کا پلندہ تھی،انہیں عوام سے کوئی سروکار نہیں باہر پڑے اپنے سرمائے کی فکر ہے،وزیراعظم عمران خان نے پاکستان کا عالمی تشخص دوبارہ بحال کیا ہے جبکہ دونوں جماعتوں کی قیادتوں نے اپنے ادوار حکومت میں ملک کے تمام ادارے تباہ کئے۔اتوار کے روز وفاقی وز راء مراد سعید اور حماد اظہر کے ہمراہ میڈیا سے گفتگو کرتے ہوئے شبلی فراز نے کہا کہ مسلم لیگ(ن) اور پیپلزپارٹی نے اس ملک کے تمام اداروں کو اپنے دور حکومت میں تباہ کیا،انہیں غریب عوام سے کوئی دلچسپی نہیں ہے،دونوں جماعتوں کی قیادتوں نے اپنے اپنے کاروبار میں اضافہ،باہر جائیدادیں بنائیں اور باہر جاکر بیٹھ گئے۔انہوں نے کہا کہ وزیراعظم عمران خان نے جس ثابت قدمی سے اس وبا کے دوران حالات کو سنبھالا اور پاکستان کے عالمی تشخص کو دوبارہ بحال کیا ہے مخالفین سے ہضم نہیں ہورہا ہے۔شبلی فراز نے مزید کہا کہ بجٹ پر تنقید اپوزیشن کا حق ہے لیکن موجودہ حالات میں لوگوں کو اکسارہے ہیں۔سینیٹر شبلی فراز کے ہمراہ پریس کانفرنس کرتے ہوئے وفاقی وزیر حماد اظہر نے کہا کہ اپوزیشن نے اپنی روایات کو برقرار رکھتے ہوئے بجٹ کو مسترد کیا۔سمجھ سے بالاتر ہے کہ اپوزیشن بجٹ میں کس چیز کو رد کر رہی ہے۔حکومت نے تو کوئی نیا ٹیکس ہی نہیں لگایا۔انہوں نے کہا کہ حکومت نے ایک لاکھ 60ہزار گھرانوں کو امداد پہنچائی۔اپوزیشن اپنی عادات سے مجبور ہیں اور انہیں اپنے سرمائے کی فکر لگی ہوئی ہے،پٹرول کی قیمت تاریخ میں کبھی بھی اتنی تیزی سے نیچے نہیں گئی ہماری حکومت نے کمی کی ہے۔سیاسی پوائنٹ سکورنگ ملک میں روایت بن چکی ہے۔ماضی کی حکومتوں کی تباہ حال معیشت کو ہم نے ٹھیک کیا ہے۔حماد اظہر نے کہا کہ عالمی منڈی میں تیل کی قیمتیں اوپر گئی ہیں اس لئے پٹرول کی قیمت بڑھانا مجبوری تھی۔پریس کانفرنس سے وفاقی وزیر مواصلات مراد سعید نے اپنے خطاب میں کہا کہ دونوں جماعتیں ہمیشہ آپس میں نوراکشتی کھیلتی رہی ہیں اور اندر سے ان کے مفادات ایک ہیں۔انہوں نے کہا کہ عمران خان نے حکومت سنبھالنے کے بعد عوامی مسائل کی ترجیحات کو اولیت دی ہے،وزیراعظم عمران خان نے ختم نبوت کے حوالے سے پوری دنیا کے سامنے بھرپور طریقے سے مؤقف پیش کیا ہے۔انہوں نے کہا کہ عمران خان نے ملک کو خود دار ملک بنایا ہے،آج ہم سے کوئی ڈومور کا مطالبہ نہیں کرسکتا،عمران خان کے حلف لینے سے5روز قبل دنیا کے بڑے اخبار نے دعویٰ کیا کہ پاکستان جلد دیوالیہ ہونے والے سات ممالک میں شامل ہو جائیگا لیکن اپوزیشن کو دکھ ہے کہ پاکستان کے وزیراعظم عمران خان نے دیوالیہ ہونے سے بچایا۔تمام ادارے جو خسارے میں تھے ان کا خسارہ کم کیا ہے۔اداروں میں اصلاحات کرکے اب ادارے بہتری کی جانب جارہی ہیں
وفاقی وزرا