وزیراعلی سندھ کا ڈیفنس کے علاقے میں قتل کے واقعے کا نوٹس

وزیراعلی سندھ کا ڈیفنس کے علاقے میں قتل کے واقعے کا نوٹس

کراچی(اسٹاف رپورٹر)وزیراعلی سندھ سیدمراد علی شاہ نے ڈیفنس میں ہونے والے قتل کے واقعے کا نوٹس لیتے ہوئے رپورٹ طلب کرلی ہے۔تفصیلات کے مطابق وزیراعلی سندھ مراد علی شاہ نے کراچی کے علاقے ڈیفنس میں قتل کے واقعے کا نوٹس لیتے ہوئے آئی جی سندھ کو مقتول ذوالفقارسمیجوکے لواحقین سے تعاون کی ہدایت کی ہے۔مراد علی شاہ نے قاتلوں کو فوری گرفتار کرنے کا حکم دیتے ہوئے واقعے کی تفصیلی رپورٹ طلب کرلی۔وزیراعلی سندھ نے کہا کہ ملزم کتنا بھی طاقتور ہو، قانون سے بالاتر کوئی نہیں، مقتول کے لواحقین کے دکھ میں شریک ہیں۔یاد رہے کہ گزشتہ روز کراچی کے علاقے ڈیفنس میں فائرنگ سے ذوالفقارعلی نامی شخص کے قتل کا واقعہ پیش آیا تھا۔مقتول کے ورثا نے گذری تھانے کے باہر لاش رکھ کر احتجاجی مظاہرہ کیا تھا، اہل خانہ نے کہاتھا کہ ذوالفقار علی کی 15 روز بعد شادی تھی۔ذوالفقار علی نے وکیل خواجہ شمس الاسلام کی نوکری چھوڑ دی تھی، جس پر شمس الاسلام نے ذوالفقار کو غیرقانونی اسلحے کے الزام میں گرفتار بھی کرا دیا تھا۔اہل خانہ کے مطابق ذوالفقارعلی کی سٹی کورٹ میں پیشی تھی، ذوالفقار پیشی کے بعد ڈیفنس میں ڈیوٹی پرجا رہا تھا کہ اسے فائرنگ کرکے قتل کردیا گیا۔

مزید : صفحہ اول