کورونا وائرس، پاکستانیوں کو کس چیز کا خمیازہ بھگتنا پڑ رہا ہے؟ سینئر صحافی ارشد شریف میدان میں آگئے

کورونا وائرس، پاکستانیوں کو کس چیز کا خمیازہ بھگتنا پڑ رہا ہے؟ سینئر صحافی ...
کورونا وائرس، پاکستانیوں کو کس چیز کا خمیازہ بھگتنا پڑ رہا ہے؟ سینئر صحافی ارشد شریف میدان میں آگئے

  

گجرات(ڈیلی پاکستان آن لائن)پنجاب کے ضلع گجرات میں کورونا وائرس کے پچاس کیسز سامنے آنے کے بعد ضلع بھر کے دس مختلف علاقوں کو لاک ڈاون کردیا گیاہے۔ سینئر صحافی ارشد شریف نے سماجی رابطے کی ویب سائٹ ٹویٹر پر خبرشیئر کرتے ہوئے بتایا ہے کہ ان مریضوں میں اکثریت ان لوگوں کی ہے جو اٹلی، سپین اور یونان سے آئے ہیں۔ پاکستانی اسٹریٹجک انداز سے اپنائی گئی حکمت عملی کا خمیازہ بھگت رہے ہیں۔

ارشد شریف نے ٹویٹر پر ایک اخباری تراشہ بھی شیئر کیا ہے جس کے مطابق گجرات میں تیرہ علاقوں کو لاک ڈاون کیا گیا ہے جس میں سے دس کو مکمل جبکہ تین کو جزوی طور پر لاک ڈاون کیاگیاہے،پچاس لوگوں میں کورونا وائرس کے مثبت ٹیسٹ آنے کے بعد ضلع بھر میں لوگوں کی نقل و حرکت پر مزید سختیاں عائد کردی گئی ہیں جبکہ مریضوں میں زیادہ تر تعداد ان لوگوں کی ہے جو اٹلی، سپین یا یونان سے واپس آئے ہیں۔اخباری تراشے کے مطابق گجرات کے عزیز بھٹی شہید ٹیچنگ ہسپتال کے ایک ڈاکٹر بھی اس موذی مرض میں مبتلا ہوگئے ہیں اور ان کے ٹیسٹ کا نتیجہ مثبت نکلا ہے۔

واضح رہے پاکستان میں کورونا وائرس کے مریضوں کی تعداد ایک ہزار پانچ سو بیالیس ہوگئی ہے جبکہ 570 مصدقہ متاثرین کے ساتھ پنجاب ملک میں سب سے زیادہ متاثرہ صوبہ بن گیا ہے۔

پاکستان میں ہلاکتوں کی تعداد 15 ہے جن میں سے پانچ کا تعلق پنجاب، چار کا خیبر پختونخوا، چار مریض سندھ، جبکہ ایک ایک گلگت بلتستان اور بلوچستان میں جاں بحق ہوا ہے تاہم 28 افراد صحتیاب بھی ہوئے ہیں۔

ملک کے چاروں صوبوں کے علاوہ دارالحکومت اسلام آباد، گلگت بلتستان اور پاکستان کے زیرِ انتظام کشمیر میں بھی مکمل یا جزوی لاک ڈاؤن ہے جبکہ ملک بھر میں فوج بھی تعینات ہے۔

پاکستان کی حکومت نے چار اپریل تک ملک میں بین الاقوامی فضائی آپریشن معطل کر دیا ہے جبکہ ملک بھر میں ٹرین آپریشن بھی 31 مارچ تک بند کر دیا گیا ہے۔

عالمی بینک اور ایشیائی ترقیاتی بینک نے کورونا وائرس سے نمٹنے کے لیے پاکستان کے لیے بالترتیب 35 کروڑ اور 23 کروڑ 80 لاکھ ڈالر کی امداد کا اعلان کیا ہے۔

مزید :

قومی -کورونا وائرس -