خیبرپختونخوا میں چوہوں کا مقابلہ نہ کر پانے والے شیروں کو للکارنے چلے ہیں :حمزہ شہباز

لاہور( این این آئی)پاکستان مسلم لیگ (ن) کے مرکزی رہنما و ممبرقومی اسمبلی حمزہ شہباز نے کہا ہے کہ کسی بھی قسم کے دباؤ یاخوف میںآئے بغیر28مئی1998کو ایٹمی دھماکے کرکے وزیراعظم محمد نواز شریف نے پاکستانی قوم کو عزت سے جینا سکھایا جس کے باعث پاکستان کا دفاع ناقابل تسخیر ہوا،آج بھی ملکی ترقی کی گاڑی کے سپہ سالار نواز شریف ہیں جو انشاء اللہ 2018میں قوم کو مسائل سے آزاد ترقی یافتہ پاکستان دیں گے، عمران خان سے چوہے سنبھالے نہیں جا تے اور شیر کو للکارتے ہیں ، عمران خان چائے کی پیالی میں طوفان برپا کر لیتے ہیں لیکن جب حقیقت سامنے آتی ہے تو پھر ان کو منہ چھپانے کی بھی جگہ نہیں ملتی ،عمران خان صاحب احتساب صرف نواز شریف کا ہی نہیں بلکہ جو عمران خان کی بغل میں قبضہ گروپ ہیں ان کا بھی ہونا چاہیے ، قوم ایسے یکطرفہ احتساب کو نہیں مانتی ، احتساب ہو گا تو سب کا ہو گا،آپ تو آف شور کمپنیوں کے معاملے پر ہمارے خلاف بھاشن دیتے نہیں تھکتے تھے لیکن جب دودھ کا دودھ اور پانی کا پانی ہواتو عمران خان خود آف شور کمپنیوں کا گارڈ فادر نکلا۔ ان خیالات کا اظہار انہوں نے گزشتہ روز ایوان اقبال میں پاکستان مسلم لیگ کی طرف سے یوم تکبیر کے موقع پر منعقدہ تقریب سے خطاب کرتے ہوئے کیا ۔ اس موقع پر رکن قومی اسمبلی پر ویز ملک ، شائستہ پرویز ملک ، وحید عالم ،میئر لاہور خواجہ احمد حسان ، رکن صوبائی اسمبلی چوہدری شہباز، میاں مرغوب احمد ، خواجہ عمران نذیر ،ماجد ظہور ، میاں طارق ، غزالی سلیم بٹ، رانا مبشر اقبال ، چوہدری گلزار تاجر رہنما بابر محمو د، محمد علی میاں ، میاں طارق، تو صیف شاہ ،اوردیگر موجود تھے ۔حمزہ شہباز نے کہا کہ بدقسمتی سے بعض عناصر ملکی ترقی و جمہوریت کے مخالف ہیں جن کی راتوں کی نیندیں حرام ہوچکی ہیں اور جو ہر صبح وزیراعظم بننے کے خواب دیکھ کراٹھتے ہیں۔ حمزہ شہباز نے کہا کہ آف شور کمپنیوں کے گاڈ فادر عمران خان دوسروں کو بھاشن دینے سے پہلے اپنے دائیں قرضہ معاف کرنے والے جہانگیر ترین اور بائیں زمینوں پر قبضہ کرانے والے علیم خان کا جواب دیں ۔اسی عمران خان نے 2013کے مینڈیٹ کو تسلیم کرنے سے انکار کیا تو سپریم کورٹ کے جوڈیشل کمیشن نے دودھ کا دودھ اور پانی کا پانی کردیا۔ پانامہ لیکس میں دامن صاف ہونے کی وجہ سے محمد نواز شریف نے سپریم کورٹ کو خط لکھا۔حمزہ شہباز نے کہا کہ عمران خان قومی اسمبلی میں جواب دینے سے بھاگ گئے انہیں علم ہونا چاہیے کہ اتفاق فاؤنڈری اس وقت ایشیا کا سب سے بڑا ادارہ تھا جب نواز شریف گورنمنٹ کالج میں طالب علم تھے۔ عمران خان کو اصل خطرہ موجودہ حکومت کے دور میں ہونے والی ترقی سے ہے خیبرپختونخوا میں چوہوں کا مقابلہ نہ کرپانے والے شیروں کو للکارنے چلے ہیں انہیں بالاآخر ناکامی کا سامنا کرنا پڑے گا۔ عدلیہ بحالی کے وقت محمد نواز شریف کسی خطرے کی پرواہ کئے بغیرباہر نکلے جبکہ آج بڑھکیں مارنے والے عمران خان اس وقت بھی دور دور تک نظر نہیں آئے۔حمزہ شہباز نے کہا کہ شریف فیملی پر مشرف کا نیب ایک پائی کی کرپشن ثابت نہیں کرسکا اور آج بھی اربوں ڈالر کی ہونے والی سرمایہ کاری پر کوئی ایک انگلی بھی نہیں اٹھی۔ ہمیں عمران خان کی طرح بڑے بڑے عہدوں کا شوق نہیں ، عوام کا بھرپور اعتماد محمد نواز شریف اور ان کی حکومت کو حاصل ہے اور انشاء اللہ ترقی و خوشحالی کا سفر پورے زوروشور سے جاری رہے گا ۔پاکستان کے باسیوں کو شدت سے 2018کا انتظار ہے اور موجودہ قومی قیادت عوام کے اعتماد پر اسی طرح پورا اترے گی جیسے آج سے 18سال پہلے 5ایٹمی دھماکے کرکے دشمن کی آنکھوں میں آنکھیں ڈال کر بتا دیا تھا کہ ہم ایک خوددارقوم ہیں۔ حمزہ شہباز نے کہا کہ انشاء اللہ وزیراعظم محمد نواز شریف جلد صحت یاب ہو کر وطن واپس لوٹیں گے۔یوم تکبیر کی تقریب میں مسلم لیگی کارکنوں نے زبردست جوش و خروش کا مظاہرہ کیا ، چاغی کے پہاڑو میزائل کے ماڈل اٹھائے کارکن زبردست نعرے بازی کرتے رہے اور شیراں دے پتر شیر ، دیکھو دیکھو کون آیا ، اک واری فیر کے نعرے لگاتے ملی نغموں پر جھومتے رہے۔اراکین قومی و صوبائی اسمبلی ، مسلم لیگ (ن) لاہور کے عہدیداران اور خواتین کارکنوں کی بڑی تعداد نے حمزہ شہباز کا استقبال کیا۔خواجہ احمد حسان نے وزیراعظم محمد نواز شریف کی جلد صحت یابی کے لئے دعاکرائی جبکہ پرویز ملک نے کہاکہ 31مئی کو ہر پارٹی دفتر میں وزیراعظم کی صحت یابی کے لئے خصوصی دعائیں کی جائیں گی۔ تقریب میں یوم تکبیر کے حوالے سے ڈاکومنٹری فلم اورخصوصی نغمے پیش کئے گئے۔