اسرائیلی فوج کی لبنان کی بحری اور فضائی حدود کی خلاف ورزیاں جاری

اسرائیلی فوج کی لبنان کی بحری اور فضائی حدود کی خلاف ورزیاں جاری

بیروت (اے این این)لبنانی فوج نے کہا ہے کہ اسرائیلی بحریہ اور فضائیہ نے اس کی بحری اور فضائی حدود کی مسلسل خلاف ورزیاں جاری رکھی ہوئی ہیں۔ فلسطینی میڈیا رپورٹس کے مطابق لبنانی فوج کی طرف سے جاری کردہ ایک بیان میں کہا گیا ہے کہ گذشتہ روز جنوبی ساحلی علاقے الناقورہ میں اسرائیل کی جنگی کشتیاں لبنان کی سمندری حدود کو پار کرتی ہوئی لبنان کی حدود میں داخل ہوگئیں۔ اسی دوران اسرائیل کے بغیر پائلٹ جاسوس طیارے لبنان کی فضائی حدود میں داخل ہوگئے تھے۔لبنانی فوج کی سرکاری ویب سائٹ پر پوسٹ ایک بیان میں کہا گیا ہے کہ اسرائیلی بحریہ کی 8 جنگی کشتیاں راس الناقورہ سے 455 میٹر لبنان کی حدود میں داخل ہوگئیں۔بیان کے مطابق اسرائیلی بحریہ نے جمعرات اور جمعہ کے درمیان سمندری حدود کی خلاف ورزی کی۔

جبکہ جمعہ کی شام کو اسرائیلی فوج کے ڈرون طیارے لبنان کی فضائی حدود میں داخل ہوئے جو جنوبی سرحدی قصبے رمیش کے اوپر پرواز کرنے کے بعد واپس ہوئے۔بیان میں کہا گیا ہے کہ اسرائیلی بحریہ اور فضائیہ کی جانب سے لبنان کی حدود کی خلاف ورزیوں کے واقعات کی روک تھام کیلئے لبنانی فوج اقوام متحدہ کے ساتھ مل کر کام کررہی ہے۔خیال رہے کہ لبنان اور اسرائیل کے درمیان طے پائی جنگ بندی اور سلامتی کونسل کی قرارداد 1701 میں دونوں ملکوں پر ایک دوسری کی زمینی، فضائی اور سمندری حدود کا احترام کرنے کا مطالبہ کیا گیا ہے۔

مزید : عالمی منظر