ٹی وی کمرشل اور ڈراموں میں بھی بے حد پسند کیا جارہا ہے ‘ہانیہ عامر

ٹی وی کمرشل اور ڈراموں میں بھی بے حد پسند کیا جارہا ہے ‘ہانیہ عامر
ٹی وی کمرشل اور ڈراموں میں بھی بے حد پسند کیا جارہا ہے ‘ہانیہ عامر

  

لاہور(فلم رپورٹر)پاکستان میں بسنے والے فن کار اپنے جنون سے دنیا بھر میں اپنی صلاحیتوں کا لوہا منوالیتے ہیں۔ ایسی ہی ایک کم عمر فن کارہ ہانیہ عامر ہیں، جو نہایت قلیل عرصے میں شو بزنس انڈسٹری میں توجہ کا مرکز بن گئی ہیں۔بلال اشرف کی فلم ’جانان‘ میں ہانیہ عامر نے اپنا شاندار ڈیبیو کیا تھا۔ اپنی پہلی ہی فلم میں ناقدین فلم کو بتادیا کہ آنے والا وقت ان کا ہے۔ جانان کے بعد ہانیہ کو مزید دو فلمیں مل گئیں، وہ نوجوان ہدایت کار نبیل قریشی کی فلم ’نامعلوم افراد ٹو‘ میں شاندار اداکاری کر کے فلم بینون کی بھرپور توجہ حاصل کی اور بعد ازاں وہ خاتون پروڈیوسر مومنہ درید کی فلم ’پرواز ایک جنون‘ میں حمزہ علی عباسی کے مدِ مقابل لیڈنگ رول میں جلوہ گر ہوکر دھوم مچادی۔ علاوہ ازیں انہیں ٹی وی کمرشل اور ڈراموں میں بھی بے حد پسند کیا جارہا ہے۔

ڈراما سیریل ’تتلی‘ میں ان کی اداکاری کو بہت سراہا گیا۔ کم عمری میں چار پانچ فلموں میں کاسٹ کیا جانا کوئی معمولی بات نہیں ہے۔ان کا کہنا تھا کہ میں کبھی اداکارہ بننا نہیں چاہتی تھی، حادثاتی طور پر شوبزنس کی چمکتی دمکتی دنیا میں داخل ہوگئی۔ میں تو اپنی پڑھائی میں مصروف تھی۔ ابھی سوچ ہی رہی تھی کہ مجھے اب میڈیکل پڑھنا ہے یا بزنس کرنا ہے۔ اس عرصے میں مجھے پروڈیوسر کی کال آئی اور میں آڈیشن کے لئے چلی گئی۔انہوں نے کہا کہ مجھے دیکھتے ہی پروڈیوسر اور ڈائریکٹر نے کہا کہ تم ہماری فلم کا کردار لوگی، ہم نے تم کو دیکھ لیا، ہم مطمئن ہوگئے ہیں۔ اس طرح مجھے فلم ’جانان‘ میں کاسٹ کرلیا گیا تھا۔ شوٹنگ کے پہلے دن میں بہت ڈری ہوئی تھی، رات کے تین بج گئے تھے، گھر سے ٹیلی فون آرہے تھے، بہت دیر ہوگئی تھی، لیکن فلم کے سیٹ پر میرے کام کی بہت تعریفین ہورہی تھیں۔ پہلے دن ملنے والی پذیرائی نے میرے حوصلے بلند کیے اور اس طرح میں شوبزنس میں متعارف ہوگئی۔ میری پہلی ہی فلم کامیاب ہوئی، اس کے بعد اب دو چار فلموں میں کام کر لیا ہے۔

مزید :

کلچر -