"والدہ کو حج و عمرہ نہیں کرواسکا"،جاوید شیخ والدین کی خدمت نہ کرنے پر جذباتی ہو گئے
لاہور (ڈیلی پاکستان آن لائن)پاکستان ڈرامہ و فلم انڈسٹری کے معروف سینئر اداکار جاوید شیخ اپنی والدہ کی محنت و جد و جہد کو یاد کرتے ہوئے جذباتی ہوگئے۔
تفصیلات کے مطابق اداکار جاوید شیخ نے اپنے ایک انٹرویو میں افسوس کا اظہار کرتے ہوئے کہا کہ " وہ اپنے والدین بالخصوص والدہ کی خدمت نہیں کرسکے۔ "جاوید شیخ نے میزبان کے سوال کا جواب دیتے ہوئے بتایا کہ "بچپن میں مالی اعتبار سے ان کے حالات اچھے نہیں تھے، ان کی والدہ نے ایک کمرے میں 8 بچوں کی پرورش کی، ان کی ضروریات کا پورا خیال رکھا,والد تو صبح کام پر چلے جاتے تھے، جس کے بعد زیادہ تر وقت والدہ کے ساتھ گزرتا، اس دوران گھریلو امور میں ان کی مدد بھی کرتے اور چھوٹے بہن بھائیوں کا خیال بھی رکھتے تھے, اداکاری سے جو کچھ کماتے وہ والدہ کو دیتے تاکہ چھوٹے بہن بھائیوں کی ضروریات پوری ہوسکیں۔"
انہوں نے ایک سوال کے جواب میں بتایا کہ" ان کے والد ان کی اداکاری کے حق میں نہیں تھے، لیکن والدہ نے ساتھ دیا اور جب بھی ریڈیو پر ڈرامہ ریکارڈ کروانے جاتے تو والدہ یہ بات والد سے چھپاتی تھی۔" دوران انٹرویو انہوں نے اس بات پر مایوسی کا اظہار کیا کہ "وہ اپنی والدہ کو حج یا عمرہ نہیں کروا سکے۔"
