عالمی برادری فلسطین میں نسل کشی روکنے کیلئے فوری اقدامات کرے: آصف زرداری 

                                                                        اسلام آباد (آن لائن)صدر مملکت آصف علی زرداری نے کہا ہے کہ عالمی برادری فلسطینی عوام کی نسل کشی روکنے کے لیے فوری اور فیصلہ کن اقدامات کرے۔ پاکستان فلسطینیوں کے ناقابل تنسیخ حقِ خودارادیت کی حمایت کے لیے پرعزم ہے، اسرائیلی دیدہ دلیری اور خطے کے دیگر ممالک کے خلاف مسلسل جارحیت پورے خطے کے امن و استحکام کو خطرے میں ڈال رہی ہے، آزادی، وقار اور انصاف کیلئے فلسطینی عوام کی جائز جدوجہد میں ان کے ساتھ کھڑے ہیں، صدر مملکت نے ان خیالات کا اظہار فلسطینیوں کے ساتھ یکجہتی کے عالمی دن کے موقع پر اپنے پیغام میں کیا۔ اسرائیل کی فوجی مہم غزہ اور دیگر مقبوضہ فلسطینی علاقوں میں نسل کشی، نقل مکانی کا باعث بن رہی ہے۔ صدر مملکت نے کہا کہ پاکستان  ایک ایسی آزاد، پائیدار اور متصل فلسطینی ریاست کے قیام کا حامی ہے جس کا دارالحکومت القدس شریف ہو۔ انہوں نے کہا کہ گزشتہ سال کے دوران اسرائیلی اقدامات کی وجہ سے بچوں اور خواتین سمیت 45 ہزار سے زائد فلسطینی اپنی جانیں کھوچکے ہیں۔ امدادی ایجنسیوں کے کام میں رکاوٹیں ڈال کر لاکھوں فلسطینیوں کو انسانی امداد سے جان بوجھ کر محروم کیا جا رہا ہے۔ بین الاقوامی قوانین کی مسلسل بے توقیری خطے میں قیام ِامن کی راہ میں سب سے بڑی رکاوٹ ہے۔ صدر مملکت نے کہا کہ پاکستان فلسطین کی حمایت جاری رکھے گا۔

 آصف زرداری