پشاور میں رواں سال قتل و اقدام قتل کے واقعات کاڈیٹا جاری ،تفصیلات جان کر آپ حیران رہ جائیں
پشاور ( ڈیلی پاکستان آن لائن ) صوبہ خیبر پختونخوا کے دارالخلافہ پشاور میں رواں سال قتل و اقدام قتل کے کتنے واقعات رونما ہوئے ؟ اس بارے میں پولیس ڈیٹا جاری کیا ہے۔
تفصیلات کے مطابق اب تک 574 مرد، خواتین اور بچے قتل ہوئے، جن میں 415 مرد، 49 خواتین جبکہ 11 بچے شامل ہیں۔ دستاویز کے مطابق اقدام قتل کے 804 واقعات کی رپورٹس بھی مختلف تھانوں میں درج ہیں۔ خواتین کے قتل کے واقعات میں 33 فیصد کمی جبکہ اقدام قتل واقعات میں 25 فیصد اضافہ ہوا۔ مردوں کے قتل واقعات میں 4 فیصد کمی اور اقدام قتل کے واقعات میں 6 فیصد اضافہ ہوا۔
"جنگ " کے مطابق گزشتہ سال 618 افراد قتل جبکہ اقدام قتل کے 773 واقعات رپورٹ ہوئے تھے۔کیپٹل سٹی پولیس آفیسر (سی سی پی او) قاسم علی خان نے بتایا کہ جائیداد و زمینی تنازعات کے باعث قتل و اقدام قتل کے بیشتر واقعات رونما ہوئے۔ انھوں نے اپیل کی کہ قتل و اقدام قتل کے واقعات میں کمی کیلئے عوام تعاون کریں۔
