نیب واحد ادارہ جس نے خود احتسابی کا عمل بھی شروع کر رکھ ہے: ڈی جی نیب لاہور

                                                                        لاہور(کرائم رپورٹر)ڈائریکٹر جنرل نیب لاہور امجد مجید اولکھ نے چیئرمین نیب کے احکامات پر نیب لاہور میں ماہانہ کھلی کچہری منعقد کی جہاں 200کے قر یب متاثرین نے شکایات پر دادرسی کیلئے شرکت کی۔ کھلی کچہری میں شریک متاثرین میں انویسٹمنٹ کے نام پر فراڈ کے شکار اور ہاؤسنگ سیکٹر کے متاثرین نے ڈی جی نیب لاہور کو مسائل سے آگاہ کیا۔ ڈی جی نیب لاہور نے تمام متاثرین کو سنا اور موقع پر احکامات صادر کئے اور کہا نیب واحد ادارہ ہے جو خوداحتسابی کے عمل پر گامزن ہے۔ نیب لاہور میں ہر ماہ کے آخری جمعہ کو کھلی کچہری میں خود کو عوام کے سامنے پیش کرتے ہیں، کھلی کچہری میں متاثرین کے علاوہ نیب تفتیش کے حوالہ سے ملزمان بھی اپنا موقف بیان کرنے کیلئے ازخود پیش ہوسکتے ہیں۔کھلی کچہری میں ڈائریکٹر جنرل نیب لاہور نے فار یو رئیل ٹریڈرز سکینڈل میں شکایات کی تحقیقات مکمل ہونے پر انتظامیہ کیخلاف باقاعدہ انکوائری کے احکامات صادر کرتے ہوئے کہا ایک ماہ کے عرصہ میں نیب لاہور نے50کروڑ سے زائد مالیت پر مشتمل 700شکایات کی سکروٹنی کا عمل مکمل کیا ہے جسکی بنیاد پر انتظامیہ کیخلاف تحقیقات کمپلینٹ ویری فکیشن سے انکوائری کے مراحل میں داخل کرنے کا فیصلہ کیا گیا۔خیابانِ امین ہاؤسنگ سوسائٹی کے متاثرین کی شکایات پر ڈ ی جی نیب کہا نیب لاہور نے مذکورہ سوسائٹی کا مکمل سیٹلمنٹ پلان تیار کر چکا ہے، انہوں نے متاثرین کو یقین دہانی کروائی کہ آئندہ چند ماہ تک تمام 700 متاثرین کو کامیابی کیساتھ فلیٹ یا پلاٹ دلوانے کا عمل مکمل کروا دیا جائیگا تاہم جن متاثرین کو پلاٹ نہ مل سکے انہیں مارکیٹ ویلیو کے مطابق رقوم کی برآمدگی کروائی جائیگی۔لاہور موٹر وے سٹی کے متاثرہ شہری کی شکایت پر فوری طور پر شکایت گزار کو پلاٹ دلوانے کے احکامات صادر کئے۔ لاہور گارڈن انتظامیہ کیخلاف شکایات ڈپٹی کمشنر اور ڈسٹرکٹ پولیس آفیسر شیخوپورہ کو مزید کارروائی کیلئے ریفر کرنے کے احکامات جاری کئے، فارمانائیٹس سوسائٹی کے متاثرین کو انویسٹ شدہ رقم پر ڈبل ریکوری فراہم کروانے کے اقدامات کئے جارہے ہیں۔ ڈی جی نیب کی جانب سے النور آرچرڈ کے متاثرین کی دادرسی کیلئے موقع پر ہی متعلقہ افسران کو ذمہ داری سونپی گئی۔

ڈی جی نیب