مصر نے 3 ماہ کیلئے ایمرجنسی نافذ کردی، معاملات فوج کے سپرد

مصر نے 3 ماہ کیلئے ایمرجنسی نافذ کردی، معاملات فوج کے سپرد
مصر نے 3 ماہ کیلئے ایمرجنسی نافذ کردی، معاملات فوج کے سپرد

  

قاہرہ(ویب ڈیسک) مصر کے صدر عبد الفتاح السیسی نے ملک بھر میں 3 ماہ کے لیے ایمرجنسی نافذ کردی ہے۔

مصر کے خبر رساں ادارے کے مطابق صدر عبدلفتاح السیسی نے کورونا وائرس کے باعث ملک کو در پیش صحت عامہ اور سیاسی بحران کی وجہ سے امن و امان کی مخدوش حالت کے پیش نظر 3 ماہ کے لیے ایمرجنسی نافذ کردی ہے جس کے لیے کابینہ نے بھی منظوری دیدی ہے اور اس کا اطلاق فوری طور پر ہوگا۔

مصری صدر کی جانب سے جاری ہدایت نامے میں کہا گیا ہے کہ ملک میں امن و امان قائم کرنے اور دہشت گردی کے خطرات کو قابو کرنے کی ذمہ داری فوج کے سپرد کی جارہی ہے، کسی کو بھی ملک کی سالمیت سے کھیلنے کی اجازت نہیں دی جائے گی۔مصری صدر السیسی نے اپنے حکم نامے میں فوج کو پولیس کی مدد سے نجی و حکومتی املاک کی حفاظت اور شہریوں کی سلامتی کو یقینی بنانے کی ہدایت کی ہے جب کہ عوام سے حکومتی احکامات پر عمل کرنے کی اپیل کرتے ہوئے کہا کہ خلاف ورزی کرنے والے کے خلاف ایمرجنسی قوانین کے تحت کارروائی کی جائے گی۔

واضح رہے کہ جنرل عبد الفتاح السیسی نے 2014 میں ملک کے صدر کی حیثیت سے عہدہ سنبھالا تھا اور تب سے اب تک 3 وزرائے اعظم تبدیل ہوچکے ہیں تاہم صدر کی مرکزی حیثیت اور طاقت کا مرکز برقرار ہے۔یاد رہے کہ عالمی وبا کورونا وائرس کے سبب دنیا بھر میں ہلاکتوں کی تعداد 2 لاکھ 28 ہزار دو سو سے بڑھ گئی جبکہ 32 لاکھ 20ہزار 338 افراد متاثر ہو گئے ہیں۔دنیا بھر میں کورونا سے متاثرہ افراد میں سے 10 لاکھ تین سو سے زائد افراد صحت یاب بھی ہو چکے ہیں۔

امریکہ میں کورنا وائرس سے مزید 1,374 افراد موت کے منہ میں چلے گئے جس کے بعد امریکہ میں اموات کی تعداد 61 ہزار 600 سے تجاوز کر گئی ہے۔امریکہ میں متاثرہ افراد کی تعداد 10 لاکھ 64 ہزار سے زائد ہو گئی ہے جبکہ صحتیاب ہونے والوں کی تعداد ایک لاکھ 47 ہزار 4 سو سے زائد ہوگئی۔

برطانیہ میں کورونا سے مزید 4419 افراد کی موت کے بعد اب تک مرنے والوں کی تعداد 26 ہزار سے تجاوز کر گئی جبکہ متاثرہ افراد کی تعداد ایک لاکھ 65 ہزار سے زائد ہے۔سپین میں بھی گزشتہ 24 گھنٹے کے دوران مزید 453 افراد کی اموات کے بعد اب تک ہلاک ہونے والے افراد کی تعداد 24 ہزار275 ہوگئی اور متاثرہ افراد کی تعداد 2 لاکھ 36 ہزار سے بڑھ گئی ہے۔

 اٹلی میں کورونا وائرس نے مزید 323 افراد کی جان لے لی جہاں اب تک ہونے والی اموات 27 ہزار 682 ہو گئیں۔ اٹلی میں کورونا سے متاثرہ افراد کی تعداد 2 لاکھ 3 ہزار سے زائد ہے۔فرانس میں بھی کورونا نے مزید 427 افراد کی جان لے لی۔ فرانس میں مرنے والوں کی تعداد 24 ہزار 87 ہو گئی اور متاثرہ افراد کی تعداد ایک لاکھ 66 ہزار سے تجاوز کر گئی۔

جرمنی میں بھی کورونا سے اموات کا سلسلہ جاری ہے اب تک ہونے والی اموات کی تعداد 6 ہزار 400 سے بڑھ گئی ہے جب کہ کورونا کے مریضوں کی تعداد 1 لاکھ 66 ہزار سے تجاوز کر گئی ہے۔ترکی میں بھی کورونا کے وار جاری ہیں۔ گزشتہ 24 گھنٹے کے دوران مزید 92 افراد موت کے منہ میں چلے گئے جس کے بعد اموات کی تعداد 3 ہزار سے تجاوز کر گئی۔ایران میں کورونا سے اب تک 93 ہزار657 افراد متاثر ہوئے اور ہلاکتوں کی تعداد 5 ہزار 950 سے بڑھ گئی ہے۔

مزید :

بین الاقوامی -