اسلامیہ یونیورسٹی بہاولپور کو ہیپا ٹائٹس فری قراردے دیا گیا
لاہور (پ ر)اسلامیہ یونیورسٹی بہاول پور پنجاب کی پہلی یونیورسٹی ہے جسے ہیپاٹائٹس فری یونیورسٹی قرار دیا گیا ہے۔ انجینئر پروفیسر ڈاکٹر اطہر محبوب وائس چانسلر اسلامیہ یونیورسٹی بہاول پور کے ویژن کے مطابق سال 2020میں محکمہ صحت کے تعاون سے اسلامیہ یونیورسٹی بہاول پور میں بڑے پیمانے پر ہیپاٹائٹس ٹیسٹنگ، سکرینگ اور ویکسی نیشن کاآغاز کیا گیا۔ ابتداء میں جامعہ کے 22ہزار اساتذہ، ملازمین اور طلباء وطالبات کے ٹیسٹ ہوئے اور ویکسین کا آغازہوا۔اب یہ ہیپا ٹائٹس فری یونیورسٹی بن چکی ہے۔ اس موقع پر بتایا گیاکہ اسلامیہ یونیورسٹی بہاول پور میں داخلوں کے موقع پر تمام طلباء وطالبات کی ہیپاٹائٹس سکرینگ ہوتی ہے۔ترجمان کا کہنا ہے کہ یونیورسٹی کے تمام 60ہزار سے زائد طلباء و طالبات، اساتذہ اور ملازمین اس بیماری سے محفوظ ہیں۔
اسلامیہ یونیورسٹی بہاول پور میں اس مہم کے فوکل پرسن چیف میڈیکل افیسر اور میڈیکل اینڈ ہیلتھ ڈویڑن کے سربراہ ڈاکٹر محمد عثمان چیمہ نے یونیورسٹی کے سینئر اساتذہ اور اعلیٰ حکام کے ساتھ مل کر یہ مہم چلائی۔گورنر پنجاب نے اسلامیہ یونیورسٹی بہاول پور کو پہلی ہیپاٹائٹس فری یونیورسٹی بننے پر مبارکباد دی۔اس سلسلے میں گورنر پنجاب نے پنجاب کی تمام جامعات کو ہیپاٹائٹس فری جامعات بنانے کے لیے ضروری اقدامات اٹھانے کے احکامات جاری کیے ہیں۔ گورنر ہاؤ س کی جانب سے جاری کیے گئے مراسلے میں پنجاب کی تمام سرکاری و نجی جامعات کو احکامات جاری کیے گئے ہیں۔ ڈاکٹر محمد عثمان چیمہ نے وائس چانسلر انجینئر پروفیسر ڈاکٹر اطہر محبوب کی ہدایت پر پنجاب کی تمام جامعات میں ہیپاٹائٹس کنٹرول پروگرام کے تحت اسلامیہ یونیورسٹی بہاول پور کی طرز پر خصوصی مہم چلانے کی تجویز دی اور گورنرپنجاب کی ہدایت کی روشنی میں پنجاب کی تمام جامعات میں اس کا آغاز ہو گیا ہے۔
