تیل کی خریداری کا معاملہ، روسی وفد کا آئندہ ماہ پاکستان آنے کا امکان

اسلام آباد (ڈیلی پاکستان آن لائن) پاکستان اور روس کے درمیان تیل کی خریداری کے حوالے سے پیشرفت ہوئی ہے جس کے تحت روسی وفد کا 19 اور 20 جنوری کو دورہ پاکستان متوقع ہے۔

 نجی ٹی وی چینل "دنیا نیوز"نے ذرائع کے حوالے سے بتایا کہ خام تیل اور پٹرولیم مصنوعات کی خریداری سے متعلق پاک روس وڈیو لنک اجلاس ہوا، اجلاس میں وزیر مملکت پٹرولیم مصدق ملک اور سیکرٹری پٹرولیم شریک ہوئے، اجلاس میں روسی وزارت توانائی کے حکام نے بھی شرکت کی۔

رپورٹ کے مطابق ویڈیو لنک اجلاس میں دونوں ملکوں کے درمیان آئندہ ہونے والے انٹر گورنمنٹل کمیشن کے اجلاس کے ایجنڈے پر بھی بات چیت ہوئی، اس ضمن میں روسی وزیر توانائی کی سربراہی میں وفد 19 اور20 جنوری کو پاکستان آئے گا۔