پشاور پولیس لائنز کی مسجد میں دھماکہ ، وزیر دفاع خواجہ آصف نے بیان جاری کر دیا
اسلام آباد (ڈیلی پاکستان آن لائن )وزیر دفاع خواجہ آصف نے کہا ہے کہ دہشت گرد نماز کے دوران پہلی صف میں موجود تھا، یہ کون لوگ ہیں ان کا دین سے کیا تعلق ہے؟
تفصیلات کے مطابق اپنے بیان میں انہوں نے کہا کہ دھماکے میں لوگ شہید اور زخمی ہوئے، دہشت گرد مسجد میں پہلی صف میں کھڑا تھا، یہ کون لوگ ہیں اور ان کا دین سے کیا تعلق ہے؟انہوں نے مزید کہا کہ دہشت گردوں نے پولیس کو ٹارگٹ کیا ہوا ہے، ہمارا ایک صوبہ کسی حد تک اس وقت حالت جنگ میں ہے، خیبرپختونخوا میں امن و امان بحال کیا جائے۔
یاد رہے کہ پولیس لائنز کی مسجد میں ہونے والے دھماکے میں اب تک شہادتوں کی تعداد 32 پر پہنچ گئی ہے جبکہ 70 سے زائد افراد زخمی ہیں اور ملبے تلے دبے افراد کو نکالنے کیلئے ریسکیو آپریشن بھی جاری ہے ۔
