سندھ میں مکمل لاک ڈاﺅن کی اجازت نہیں دی جائے گی : فواد چودھری

اسلام آباد(ڈیلی پاکستان آن لائن ) وفاقی وزیر اطلاعات و نشریات فواد چودھری نے کہا ہے کہ کہ اگر ایس او پیز پر عمل درآمد ہوتا تو کراچی میں صورتحال سنگین نہ ہوتی ،سندھ میں مکمل لاک ڈاون کی اجازت نہیں دی جائے گی۔ہم نیوز کے مطابق پاکستان تحریک انصاف سے تعلق رکھنے والے وفاقی وزیر فواد چودھری نے کہا کہ کراچی ملکی معیشت کی شہ رگ ہے،ایسا قدم اٹھانے کی اجازت نہیں دی جا سکتی جس سے ملکی معیشت متاثر ہو۔انہوں نے کہا کہ مکمل لاک ڈاون سے متعلق وفاق کی پالیسی واضح ہے، سپریم کورٹ نے کہا ہے کہ صوبے اس ضمن میں انفرادی فیصلہ نہیں کرسکتے ہیں۔
وفاقی وزیر اطلاعات و نشریات نے کہا کہ کورونا سے متعلق پالیسی این سی اوسی جاری کرتا ہے، صوبے اس پالیسی پرعملدرآمد کے پابند ہیں، مکمل لاک ڈاون کے بارے میں وزیراعظم کا واضح موقف ہے کہ اس سے دیہاڑی دار طبقہ زیادہ متاثر ہوتا ہے۔فواد چودھری نے کہا کہ سندھ حکومت کو واضح پیغام دے دیا ہے کہ انفرادی فیصلے نہیں کیے جا سکتے ہیں۔ انہوں نے کہا کہ این سی اوسی گائیڈ لائنز پرعملدرآمد ضروری ہے۔