بنگلہ دیش، دریا میں 2کشتیوں کے درمیان تصادم، 23مسافر ڈوب کر ہلاک
ڈھاکہ (این این آئی) بنگلا دیش کے ایک دریا میں دو مسافر بردار کشتیاں آپس میں ٹکرا گئیں جس کے نتیجے میں 23 افراد ڈوب کر ہلاک ہوگئے جب کہ 12 افراد تیر کر دریا کنارے پہنچنے میں کامیاب رہے۔ عالمی میڈیا کے مطابق بنگلا دیش میں دارالحکومت ڈھاکا کے قریب دریائے بْوڑھی گنگا میں دو کشتیاں آپس میں ٹکرا گئیں جس میں سے ایک کشتی میں 50 سے زائد مسافر سوار تھے۔ کشتی الٹنے سے تمام مسافر ڈوب گئے جن میں سے 12 تیر کر دریا عبور کرنے میں کامیاب رہے۔بنگلا دیش کی واٹر ٹرانسپورٹ اتھارٹی کے سربراہ کموڈور غلام صادق نے بتایا کہ 10 سے 15 کے قریب مسافر تیر کر کنارے تک پہنچنے میں کامیاب ہوئے جبکہ ریسکیو ادارے کے غوطہ خوروں کی مدد سے 23 نعشیں نکالی جا چکی ہیں بقیہ لوگ تاحال لاپتہ ہیں، کشتیوں میں 50 سے زائد افراد سوار تھے۔کشتیوں کے تصادم کی وجہ کا تاحال تعین نہیں کیا جا سکا ہے اس حوالے سے ایک انکوائری کمیٹی تشکیل دیدی گئی۔ بنگلا دیش میں بحری سفر کیلئے اقدامات اور سہولیات ناکافی ہیں جس کے باعث حادثات عام ہیں۔
دو کشتیوں میں تصادم
