کنونشن سینٹر میں منعقدہ ایمبسڈر فنڈ کی افتتاحی تقریب ، 5 منٹ تک بجلی غائب
اسلام آباد ( آئی این پی ) اقوام متحدہ پاکستان کے زیر اہتمام ملک میں تعلیم کے فروغ کےلئے کنونشن سینٹر میں منعقدہ ایمبسڈر فنڈ کی افتتاحی تقریب کے دوران واپڈا نے اپنا کمال دکھا دیا ، تقریب کے دوران ہی 5 منٹ تک بجلی غائب رہی جس سے سٹیج پر موجود گورنر پنجاب اور وزیر مملکت کوغیر ملکی مہمانوں کے سامنے شدید خفت کا سامنا کرنا پڑا ، بجلی کی بندش سے حال میں مکمل طور پر اندھیرا چھا گیا ۔ ہفتہ کو جناح کنونشن سنٹر اسلام آباد میں اقوام متحدہ پاکستان کے زیر اہتمام ملک میں تعلیم کے فروغ کےلئے ایمبسڈر فنڈ کے قیام کے حوالے سے منعقدہ افتتاحی تقریب کے دوران اس وقت دلچسپ صورتحال پیدا ہوگئی جب واپڈا نے اپنا کمال دکھاتے ہوئے 5 منٹ تک کنونشن سنٹر کی بجلی بند کردی جس کے باعث حال میں مکمل طور پر اندھیرا چھا گیا جس سے حال میں موجود وفاقی دارالحکومت کے مختلف تعلیمی اداروں سے تعلق رکھنے والے طالبات کا شور بلند ہوگیا اور اس موقع پر غیر ملکی مہمانوں کے سامنے گورنر پنجاب چوہدری محمد سرور ، وزیرمملکت برائے تعلیم وتربیت میاں بلیغ الرحمن کو شدید غفت کا سامنا کرناپڑا تاہم کنونشن سنٹر کی انتظامیہ کی جانب سے 5 منٹ بعد متبادل نظام کے تحت بجلی بحال کردی گئی ۔
