وکٹ کیپر بلے باز جونی بئیر سٹو ڈٹ گئے ،انگلینڈ290رنز بنانے میں کامیاب
کرائسٹ چرچ(ڈیلی پاکستان آن لائن)جونی بیئرسٹو کی جرات مندانہ اننگز نے انگلینڈ کو مکمل تباہی سے بچا لیا اور نیوزی لینڈ کے خلاف دوسرے ٹیسٹ میچ کے پہلے روز کھیل ختم ہونے تک مہمان ٹیم نے پہلی اننگز میں 8 وکٹوں کے نقصان پر 290 رنز بنا لیے ہیں۔
Jonny Bairstow's 97* and a Mark Wood's 52 help England get to 290/8 on the first day of the final Test after Tim Southee and Trent Boult rattle the top order. #NZvENG SCORECARD ➡️ https://t.co/HUvzTsvGZK pic.twitter.com/Sa5G4rupBh
— ICC (@ICC) March 30, 2018
جمعہ کو کرائسٹ چرچ میں شروع ہونے والے دوسرے اور آخری ٹیسٹ میچ میں نیوزی لینڈ کے قائد کین ولیمسن نے ٹاس جیت کر پہلے انگلینڈ کو بیٹنگ کی دعوت دی اور ان کا یہ فیصلہ باولرز نے بالکل درست ثابت کر دکھایا۔ٹم ساودھی اور ٹرینٹ بولٹ نے ایک بار پھر حریف بلے بازوں کو پریشانی سے دوچار کیا اور اننگز کے تیسرے ہی اوور میں مہمان ٹیم کو سٹار بلے باز ایلسٹر کک کا نقصان اٹھانا پڑا جو 2 رنز بنا کر بولٹ کی گیند پر بولڈ ہوئے۔
38 کے اسکور پر جیمز ونس 18 رنز بنانے کے بعد ساودھی کی گیند پر ایل بی ڈبلیو ہوئے تو اس موقع پر کپتان جوروٹ نے سٹون مین کے ساتھ مل کر ٹیم کو سہارا دینے کی کوشش کی تاہم 93 کے سکور پر ساوتھی نے روٹ کو کلین بولڈ کر کے ٹیم کو بڑی کامیابی دلائی۔اگلے ہی اوور میں بولٹ نے ڈیوڈ ملان کو آوٹ کر کے مہمان ٹیم پر دباو بڑھا دیا جو بغیر کوئی رن بنائے پویلین لوٹے جبکہ سٹون مین 35 رنز بنا کر آوٹ ہوئے تو 94 رنز پر آدھی انگلش ٹیم پویلین لوٹ چکی تھی۔اس مشکل مرحلے پر بین سٹوکس اور بیئرسٹو نے مل کر 57 رنز کی شراکت قائم کی بولٹ نے 25 رنز بنانے والے سٹوکس کو ٹھکانے لگا کر اپنی ٹیم کو چھٹی کامیابی دلائی جبکہ سٹورٹ براڈ کی اننگز بھی 5 رنز پر تمام ہوئی۔دوسرے اینڈ سے بیئرسٹو ڈٹے رہے اور مارک وڈ کے ساتھ آٹھویں وکٹ کی شراکت میں 95 قیمتی رنز جوڑ کر ٹیم کو مکمل تباہی سے بچایا، 259 کے سکور پر وڈ 52 رنز کی عمدہ اننگز کھیلنے کے بعد ساودھی کی گیند پر بولڈ ہوئے۔
جب میچ کے پہلے دن کا کھیل ختم ہوا تو انگلینڈ نے 8 وکٹوں پر 290 رنز بنائے تھے، بیئرسٹو 97 رنز بنا کر وکٹ پر موجود ہیں اور انہیں کیریئر کی پانچویں سنچری بنانے کے لیے صرف 3 رنز درکار ہیں جبکہ اور لیچ 10 رنز کے ساتھ ان کا ساتھ نبھا رہے ہیں۔
بولٹ اور ساودھی پر مشتمل نیوزی لینڈ کی فاسٹ باولنگ جوڑی نے ایک مرتبہ پھر شاندار باولنگ کا مظاہرہ کیا جہاں ساودھی نے 5 اور بولٹ نے 3 وکٹیں لیں۔