وزیراعظم شہباز شریف کا جسٹس قاضی فائز عیسیٰ کیخلاف کیورویٹیور ریویو ریفرنس واپس لینے کا حکم
اسلام آباد(ڈیلی پاکستان آن لائن)وزیراعظم شہباز شریف نے سپیرم کورٹ کے جج جسٹس قاضی فائز عیسیٰ کیخلاف کیورویٹیور ریویو ریفرنس واپس لینے کا حکم دیدیا۔
نجی ٹی وی چینل ایکسپریس نیوز کے مطابق حکومت نے جسٹس قاضی فائز عیسیٰ کیخلاف کیورویٹیور ریویو ریفرنس کی پیروی نہ کرنے کا فیصلہ کرتے ہوئے کہاہے کہ کمزور بے بنیاد جوہات پر کیوریٹیوریویو ریفرنس دائر ہوا۔
وزیراعظم شہبازشریف کی زیرصدارت کابینہ پہلے ہی اس فیصلے کی منظوری دے چکی ہے،وزیراعظم نے وزیر قانون کو کیوریٹیوریویو ریفرنس واپس لینے کی ہدایت کردی ۔
وزیراعظم شہبازشریف کاکہناتھا کہ ریفرنس کے نام پر جسٹس قاضی فائز عیسیٰ اور اہلخانہ کو ہراساں و بدنام کیاگیا، یہ ریفرنس نہیں منصف کیخلاف عمران خان کی انتقامی کارروائی تھی، یہ عدلیہ کی آزادی پر شب خون اور اسے تقسیم کرنے کی مذموم سازش تھی، وزیراعظم نے کہاکہ ن لیگ و اتحادیوں نے اپوزیشن کے دور میں بھی جھوٹے ریفرنس کی مذمت کی، عمران نیازی نے صدر کے آئینی منصب کا مجرمانہ فعل کیلئے ناجائز استعمال کیا، صدر علوی عدلیہ پر حملے کے جرم میں آلہ کار اور جھوٹ کے حصہ دار بنے، بار کونسل اور وکلا تنظیموں نے بھی مخالفت کی تھی ان کی رائے کی قدر کرتے ہیں ۔
