جسٹس قاضی فائز عیسیٰ کے خلاف دائر ریفرنس واپس لینے کے لیے صدر کو خط لکھ دیا گیا
اسلام آباد(ڈیلی پاکستان آن لائن)وزیر اعظم شہباز شریف نے جسٹس قاضی فائز عیسیٰ کے خلاف دائر ریفرنس واپس لینے کے لیے صدر عارف علوی کو خط لکھ دیا ہے۔
صدر کو لکھے گئے خط میں کہا گیا ہے کہ آئین کے آرٹیکل 48 (1) اور وفاقی کابینہ کے فیصلے کے مطابق صدر کو ایڈوائس کی جاتی ہے کہ وہ کیوریٹیو ریویو ریفرنس اور نظرثانی کی متفرق سول اپیلیں واپس لیں۔
خط میں وزیر اعظم نے کہا ہے کہ پی ٹی آئی حکومت نے سپریم کورٹ کے 26 اپریل 2021 کے جسٹس قاضی فائز عیسیٰ کیس میں فیصلے کے خلاف کیوریٹیو ریویو اور نظرثانی کی متفرق سول درخواستیں دائر کی تھیں۔ قاضی فائز عیسیٰ بنام صدر پاکستان و دیگر کے عنوان سے 9 سول متفرق درخواست دائر ہوئی تھیں، 2020 میں دائر ان سول متفرق درخواستوں میں 296، 297، 298، 299، 300، 301، 308، 309 اور 409 شامل ہیں۔
وزیراعظم نے صدر کو کیوریٹیو ریویو ریفرنس اور متفرق درخواستوں کی واپسی پر دستخط کرنے کی سفارش کی ہے۔
