یوں زبانی نہ جتاتا کہ محبت کیا ہے
میں تجھے کر کے دکھاتا کہ محبت کیا ہے
کیسے سینے سے لگاؤں کہ کسی اور کے ہو
میرے ہوتے تو بتاتا کہ محبت کیا ہے
عشق سے لے کے ہوس تک میں تجھے لے جاتا
کاش تو پوچھنے آتا کہ محبت کیا ہے
خوب سمجھاتا تجھے تیری مثالیں دے کر
تجھ میں احساس جگاتا کہ محبت کیا ہے
پاگلوں جیسی بنا دیتا میں حالت تیری
پھر تجھے خود سمجھ آتا کہ محبت کیا ہے
عشق کی آگ خد و خال بھی گم کر دیتی
آئینہ یاد دلاتا کہ محبت کیا ہے
یہ تو میں یاد دلا جاتا ہوں آتے جاتے
ورنہ تو بھول ہی جاتا کہ محبت کیا ہے
کلام : رانا سعید دوشی