سرور کونین حضرت محمدﷺ کی بعثت سسکتی ، مرجھائی اور جہالت میں ڈوبی انسانیت کےلئے ابربہار کی حیثیت رکھتی ہے: سردار عثمان بزدار 

 سرور کونین حضرت محمدﷺ کی بعثت سسکتی ، مرجھائی اور جہالت میں ڈوبی انسانیت ...
 سرور کونین حضرت محمدﷺ کی بعثت سسکتی ، مرجھائی اور جہالت میں ڈوبی انسانیت کےلئے ابربہار کی حیثیت رکھتی ہے: سردار عثمان بزدار 

  

لاہور( ڈیلی پاکستان آن لائن )وزیر اعلیٰ پنجاب سردار عثمان بزدارنے نبی آخرالزماں حضرت محمدﷺکی ولادت باسعادت کے پرمسرت موقع پر امتِ مسلمہ کو مبارکباددیتے ہوئے کہا کہ سرور کونین حضرت محمدﷺ کی بعثت سسکتی ، مرجھائی اور جہالت میں ڈوبی انسانیت کےلئے ابربہار کی حیثیت رکھتی ہے۔ محسن انسانیت حضرت محمدﷺ اپنے اعلیٰ کردار کے ذریعے دنیا کیلئے ایک مثال بنے اور حضورکریم ﷺنے مختصر مدت میں مثالی سماجی اور معاشی نظام دیا۔ وزیر اعلیٰ عثمان بزدارنے عیدمیلاد النبیﷺ کے موقع پر اپنے پیغام میں کہا کہ نبی آخرالزماںﷺ نے امن وآشتی،اخوت،احترام انسانیت، مساوات،عفوودرگزراور عدل و انصاف کا درس دیا ۔ آپﷺ کی زندگی مجسم قرآن ہے جس میںمکمل رہنمائی اور ہدایت موجود ہے۔حضوراکرم ﷺ کی تعلیمات پر عمل پیرا ہو کرمعاشرے سے ظلم ،زیادتی،ناانصافی اوربدامنی کا خاتمہ کیا جاسکتا ہے ۔آپ ﷺکے اسوہ حسنہ پر عمل پیرا ہوکرپاکستان کو درپیش تمام مسائل سے نجات دلا کرامن کا گہوارہ بنایا جاسکتا ہے۔رسولِ اکرم ﷺ کی سنت سے مسائل کا حل افہام و تفہیم اور مکالمے کے ذریعے نکالنے کا درس ملتا ہے۔ نبی اکرم ﷺ کی محبت کا تقاضا ہے کہ ہم اپنے اختلافات کو مفاہمتی حکمت عملی کی روشنی میں حل کر یں ۔یہ دن امت مسلمہ کو قرآن و سنت کی تعلیمات پر حقیقی معنوں میں عمل پیرا ہونے کا بہترین موقع فراہم کرتا ہے۔ ہمیں اس عزم کا اعادہ کرنا ہے کہ اپنی زندگیوں کو نبی آخرالزما ںﷺکی تعلیمات کے مطابق بسر کریں گے۔ اللہ تعالیٰ ہم سب کی کوتاہیوں کو معاف فرمائے اور ہمیں محسن انسانیت حضور اقدس ﷺکی شفاعت نصیب فرمائے۔

مزید :

قومی -