سی ٹی او کا ٹریفک نظام میں مزید بہتری لانے کیلئے جی ٹی روڈ کا دورہ

سی ٹی او کا ٹریفک نظام میں مزید بہتری لانے کیلئے جی ٹی روڈ کا دورہ

  

پشاور(کرائم رپورٹر) چیف ٹریفک آفیسر عباس مجید خان مروت نے ٹریفک نظام میں مزید بہتری لانے اور تجاوزات مافیا کیخلاف کی جانیوالی کارروائیوں کے بعد کی صورتحال کا جائزہ لینے کیلئے گزشتہ روز جی ٹی روڈ کا دورہ کیا۔ دورے کے دوران ایس پی ہیڈ کوارٹرز فضل احمد جان ' ڈی ایس پی ہیڈ کوارٹر زیور شاہ اور دیگر ٹریفک افسران بھی ان کے ہمراہ تھے۔ چیف ٹریفک آفیسر عباس مجید خان مروت نے ٹریفک کی روانی اور سٹی ٹریفک پولیس پشاور کی جانب سے تجاوزات مافیا کے خلاف کی جانیوالی کارروائیوں کے نتیجے میں آنیوالی بہتری ون ویز اور ہشت نگری میں بی آر ٹی سٹیشن میں جاری ترقیاتی کام کا جائزہ لیا جس پر اطمینان کا اظہار کرتے ہوئے ٹریفک حکام کو ہدایت کی کہ ون ویز  کی خلاف ورزی کرنیوالوں کے خلاف قانونی کارروائی عمل میں لائیں اور اس سلسلے میں کسی کے ساتھ کوئی نرمی نہ برتی جائے۔ انہوں نے ٹریفک حکام کو ہدایت کی کہ وہ روزانہ کی بنیاد پر تجاوزات مافیا کے خلاف کارروائیاں کریں تاکہ شہریوں کو کسی قسم کے مشکلات درپیش نہ ہوں۔ انہوں نے کہا کہ ٹریفک عملہ فٹ پاتھوں کو تجاوزات مافیا سے واگزار کرائیں تاکہ پیدل چلنے والوں کو بھی کسی قسم کے مشکلات درپیش نہ ہوں۔ چیف ٹریفک آفیسر عباس مجید خان مروت نے کہا ہے کہ تجاوزات مافیا کے خلاف بلا تفریق کارروائیاں جاری رہیں گی اس سلسلے میں تاجر برادری سٹی ٹریفک پولیس پشاور کے ساتھ تعاون کریں تاکہ شہر کی خوبصوررتی کو یقینی بنائی جا سکے۔ انہوں نے کہا کہ سٹی ٹریفک پولیس پشاور کے حکام تجاوزات مافیا کے خلاف آپریشن کرنے کے بعد چیک اینڈ بیلنس رکھیں تاکہ تجاوزات مافیا دوبارہ اپنے حدود سے تجاوز نہ کریں جبکہ مرتکب افراد کے خلاف قانون کے مطابق سخت کارروائی عمل میں لائی جائے۔ انہوں نے کہا کہ نو پارکنگ زون میں گاڑیاں کھڑی کرنا نا قابل برداشت ہے کیونکہ اس سے ٹریفک کا نظام متاثر ہوتا ہے۔

مزید :

پشاورصفحہ آخر -