کورونا وائرس کا شکاربھارت کے سابق صدر دوران علاج انتقال کر گئے 

کورونا وائرس کا شکاربھارت کے سابق صدر دوران علاج انتقال کر گئے 
کورونا وائرس کا شکاربھارت کے سابق صدر دوران علاج انتقال کر گئے 

  

نئی دہلی (ڈیلی پاکستان آن لائن ) بھارت کے سابق صدر پرناب مکھرجی طویل علالت کے بعد انتقال کر گئے ہیں۔بھارتی میڈیا کے مطابق 13 اگست کو دماغ کی سرجری کے بعد وہ کوما میں چلے گئے تھے جب کہ ان کا کورونا ٹیسٹ بھی مثبت آیا تھا۔۔ دس اگست کو ٹویٹ میں انہوں نے بتایا تھا کہ کورونا ٹیسٹ مثبت آیا ہے۔اطلاعات کے مطابق 84 سالہ سابق بھارتی صدر پرناب مکھرجی دماغ میں موجود جمے ہوئے خون کو نکلوانے کیلئے ہسپتال میں داخل تھے اور اس دوران 21 روز قبل ہونے والے چیک اپ میں معلوم ہوا کہ انہیں کورونا وائرس بھی ہے۔پرناب مکھرجی کے بیٹے ابھیجیت نے اپنے والد کی موت کی تصدیق سوشل میڈیا پر کی ہے۔

51 سالہ سیاسی کیریئر میں پرناب مکھرجی 2012 سے 2017 کے دوران بھارت کے صدر رہے جبکہ ماضی میں وہ وزیر خزانہ، خارجہ اور دفاع بھی رہ چکے ہیں۔پرناب مکھرجی آئی ایم ایف اور ورلڈ بینک میں بھی خدمات انجام دے چکے ہیں۔پرناب مکھرجی کا تعلق موجودہ اپوزیشن جماعت کانگریس سے تھا جو بھارت میں کئی دہائیوں تک اقتدار میں رہی ہے تاہم گزشتہ دو عام انتخابات میں کانگریس کو بھارتیہ جنتا پارٹی کے ہاتھوں شکست کا سامنا رہا ہے۔پرناب مکھرجی نے 1960 کی دہائی میں کانگریس میں شمولیت اختیار کی تھی جب اندرا گاندھی بھارت کی وزیراعظم تھیں۔1986 میں پرناب مکھرجی نے کانگریس سے علیحدگی اختیار کرکے اپنی جماعت بنالی تھی تاہم دو برس بعد واپس کانگریس میں آگئے تھے۔

مزید :

بین الاقوامی -