بے بی زرداری کی سیاست والد کی کرپشن کی اسیر ہے، مراد سعید
اسلام آباد (این این آئی)پاکستان تحریک انصاف نے پاکستان پیپلز پارٹی کے چیئر مین بلاول کی تقریر پر رد عمل کا اظہار کرتے ہوئے کہا ہے کہ بے بی زرداری کی سیاست والد کی کرپشن کی اسیر ہے، حادثاتی چیئرمین کا المیہ یہ ہے کہ جب بھی ٹی وی پر نمودار ہوں گے کرپشن کا دفاع کریں گے۔پیر کو ایک بیان میں مراد سعید نے کہاکہ قومی خزانے کی چوری سے بینظیر انکم سپورٹ پروگرام کے ذریعے جیالوں میں پیسے بانٹنے تک بے بی زرداری کرپشن کی ہر واردات کا دفاع کرتے ہیں۔مراد سعید نے کہاکہ بے بی زرداری کے والد نے کرپشن کے ایسے ایسے شرمناک طریقے ایجاد کئے کہ دنیا حیران ہے، قوم نے اپنا پیٹ کاٹ کر محروم اور نادار طبقے کیلئے انکم سپورٹ پروگرام کی حمایت کی۔مراد سعید نے کہاکہ بلاول کے والد نے انکل نواز کیساتھ ملکر انکم سپورٹ کے فنڈ کو جیالے اور متوالے پالنے کیلئے استعمال کیا۔مراد سعید نے کہاکہ حکومت گرانے کا خواب باپ بیٹے کودن رات پریشان کئے ہوئے ہیں۔وفاقی وزیر نے کہاکہ ڈیڑھ سال اسی پریشانی میں گزرا آئندہ ساڑھے تین برس بھی اسی کرب میں گزریں گے۔ انہوں نے کہاکہ بلکہ اسکے بعد بھی انشاء اللہ شرمندگی اور پریشانی کا ہی سامنا رہے گا، پوری حکومت کو پیپلز پارٹی کی متعارف کردہ آلائشوں سے پاک کریں گے۔
مراد سعید
