اسرائیل کی غزہ میں 3ہسپتالوں پر وحشیانہ بمباری  مزید 50سے زائد فلسطینی شہید

                                                                                     غزہ،جنیوا (آئی این پی)اسرائیلی فورسز نے غزہ میں تین ہسپتالوں کمال عدوان، الوفااوراہلی پر گولہ باری جاری رکھی جس میں شہید ہونیوالوں کی تعداد 50سے زائد ہوگئی۔عالمی خبر رساں ادارے کے مطابق اسرائیلی فوج نے کمال عدوان اور الوفا ہسپتالوں کے بعد اہلی نامی ایک اور ہسپتال پر بھی بمباری کی،ترجمان اسرائیلی فوج نے دعویٰ کیا ان ہسپتالوں میں مریضوں کے بھیس میں حماس کے کمانڈرز اور جنگجو چھپے ہوئے تھے،ان ہسپتالوں میں کارروائی میں حماس کے 19کمانڈرز اور جنگجو لڑتے ہوئے جان کی بازی ہار گئے اور متعدد کو گر فتار کرلیا گیا۔دوسری جانب حماس نے کہا ہے اسرائیل نے ہسپتالوں میں پہلے ہی درد سے بلکتے اور زخموں سے چور شہریوں کو نشانہ بنایا جس میں 50فلسطینی شہید ہوگئے۔اسرائیل نے کمال عدوان ہسپتال کے ڈائریکٹر ڈاکٹر حسام ابو صفیہ کو حراست میں لیا ہوا ہے اور ان کی رہائی کیلئے کسی بھی دباؤ کو خاطر میں نہیں لا رہا،اس کا کہنا ہے کمال عدوان ہسپتال کو دوبارہ صحت کی خدمات انجام دینے کیلئے نہیں کھولا جائیگا۔ دوسری جانب سربراہ عالمی ادارہ صحت ٹیڈروس ایڈہانوم نے غزہ میں ہسپتالوں پر حملوں کی مذمت کرتے ہوئے کہا ہے غزہ کے ہسپتال ایک بار پھر اسرائیلی حملوں کا نشانہ بن رہے ہیں، کمال عدوان ہسپتال غیر فعال ہے، مریضوں کو انڈونیشین ہسپتال منتقل کیا گیا،جہاں 7مریض اور عملے کے 15ارکان موجو د ہیں،ٹیڈروس ایڈہانوم نے مزید کہا اہلی عرب اور الوفا ہسپتال پربھی حملہ کیا گیا،غزہ کے لوگوں کو طبی مراکز کی ضرورت ہے،اسرائیلی فوج ہسپتالوں پر حملے بند کرے۔ یاد رہے 8ا کتو بر2023ء سے غزہ پر اسرائیلی بمباری میں ابتک 45ہزار 500سے زائد فلسطینی ہوچکے ہیں جبکہ زخمیوں کی تعداد ایک لاکھ 8ہزار سے تجاوز کرگئی۔اسرائیلی بمباری میں شہید اور زخمی ہونیوالوں میں نصف تعداد خواتین اور بچوں کی ہے۔

اسرائیل بمباری