لاہور ہائیکورٹ کا تمام سکولوں کو دوبارہ رجسٹریشن کرانے کا حکم
لاہور (نامہ نگار خصوصی) لاہور ہائیکورٹ نے سموگ کے تدراک کیلئے درخواستوں پر تمام سکولوں کو ایک ماہ بعد اپنی دوبارہ رجسٹریشن کرانے کا حکم دیدیا۔لاہور ہائیکورٹ کے جسٹس شاہد کریم نے سموگ کے تدارک کیلئے درخواستوں پر سماعت کی اور سیکرٹری سکولز کو ہدایت کی کہ جو سکول بس پالیسی پر عمل نہیں کرتا اس کی رجسٹریشن معطل کردی جائے۔ عدالت نے ڈی جی ایل ڈی اے کو لاہور کی سٹرکوں کا جائزہ لیکر ٹریفک پلان بھی طلب کرلیا۔ عدالت نے ریمارکس دیئے کہ حکومت سموگ کے تدراک کیلئے بڑے اچھے اقدامات کررہی ہے۔ سیکرٹری سکولز ایجوکیشن خالد نذیر نے پرائیویٹ سکولز کے مجوزہ رولز پیش کیے اور بتایا حکومت نے پالیسی بنائی ہے سکولز کی بسیں اپنی ہوں گی تو سکولز کی رجسٹریشن ہوگی، رولز میں نئے سکولز کی رجسٹریشن کیلئے بسیں لازمی قرار دے رہے ہیں جس پر جسٹس شاہد کریم نے باور کرایا رولز بنائیں، ایس او پیز پر یقین نہیں کرتا۔ سکول بسوں کا معاملہ بہت سنجیدہ ہے، سکولز ما لکان کے پاس بہت پیسے ہیں، آئندہ سیزن سے پہلے پہلے تمام احکامات پر عمل کرانا ہے۔ جسٹس شاہد کریم نے پنجاب حکومت کے وکیل کو ایچی سن سکول کو بسوں کے معاملے پر آگاہ کرنے کی بھی ہدایت کی اورریمارکس دیئے کہ ماحولیات کا معاملہ بہت سنجیدہ ہوچکا ہے اس میں مزید وقت ضائع نہ کیا جائے۔ عدالت نے ملتان روڈ پر بسوں کے اڈے اور سوسا ئٹیز پر ٹریفک رولز پر عملدرآمد نہ ہونے پر بھی ناراضی کا اظہار کیا۔
لاہورہائیکورٹ
