معید یوسف کی افغان آئی ٹی وزیر سے ملاقات ، مشترکہ تیکنیکی ٹیم کے قیام پر اتفاق
کابل(ڈیلی پاکستان آن لائن)وزیراعظم عمران خان کے معاون خصوصی برائے قومی سلامتی امور معید یوسف نے افغانستان کے وزیر انفارمیشن ٹیکنالوجی مولوی نجیب اللہ حقانی اور دیگر حکام سے ملاقات کی ہے۔
نجی ٹی وی کے مطابق افغانستان کے دارالحکومت کابل میں ہونے والی ملاقات میں دو طرفہ تعلقات اورتعاون پر گفتگو کی گئی۔ اس موقع پرافغان وزیر انفارمیشن ٹیکنالوجی نے کہا کہ گزشتہ سالوں میں انفراسٹریکچر کی تعمیر کے منصوبوں میں افغانستان کے ساتھ کسی نے تعاون نہیں کیا، دنیا اور پڑوسی ممالک منصوبوں کی تکمیل کیلئے تعاون کریں، پاکستان فائبرکیبل سے منسلک ہونے میں دلچسپی ظاہرکرے تو دونوں ممالک کیلئے موثر ہوگا، پاکستان فائبرکیبل کے ذریعے یورپ تک ٹرانزٹ حاصل کرسکے گا، پاکستان جنوبی اور وسط ایشیا سے انٹرنیٹ ٹرانزٹ شعبے میں منسلک ہوجائے گا۔افغان وزیر نے افغانستان میں بہتر انٹرنیٹ سروس کی دستیابی کیلئے پاکستان سے اپیل کی کہ ڈارک فائبر کرائے پر مہیا کیے جائیں تاکہ سب میرین کیبل تک افغانستان رسائی حاصل کرسکے جس سے انٹرنیٹ سپیڈ میں اضافہ اور قیمتوں میں کمی آئے گی،افغان وزیر آئی ٹی اور معید یوسف کی ملاقات میں ڈاک کے شعبے میں سہولتیں پیدا کرنے پر بھی گفتگو کی گئی۔معاون خصوصی کا کہنا تھاکہ وزیراعظم پاکستان نے بہت سے شعبوں میں افغانستان کے ساتھ تعاون کرنے کا کہا ہے،دونوں ممالک نے مشترکہ تیکنیکی ٹیم کے قیام پر اتفاق کیا جو مستقبل میں مختلف معاملات پر بات کرے گی۔
