تیسرے عالمی بلائنڈ ٹی 20کرکٹ کپ کی منظوری
لاہور(سپورٹس رپورٹر):ورلڈ بلائنڈ کرکٹ کونسل نے تیسرے عالمی بلائنڈ ٹی ٹوئنٹی کپ کی منظوری دے دی جو رواں سال نومبر کے دوران بھارت میں کھیلا جائے گا۔ پاکستان بلائنڈ کرکٹ کونسل کے چیئرمین اور ورلڈ بلائنڈ کرکٹ کونسل کے صدر سید سلطان شاہ نے اے پی پی کو بتایا کہ ورلڈ بلائنڈ کرکٹ کونسل کا سالانہ اجلاس ویڈیو لنک کے ذریعے منعقد ہوا جس میں دس ممالک کے نمائندوں نے شرکت کی۔ اجلاس میں بلائنڈ کرکٹ کونسل سے متعلق مختلف فیصلے کئے گئے۔ اجلاس میں رواں سال نومبر کے مہینے میں ورلڈ ٹی ٹوئنٹی بلائنڈ ورلڈ کپ بھارت میں کرانے کی منظوری دی گئی ہے۔ انہوں نے کہا کہ ٹی ٹوئنٹی بلائنڈ ورلڈ کپ میں دس ممالک کی ٹیمیں شرکت کریں گی جن میں پاکستان، آسٹریلیا، نیوزی لینڈ، جنوبی افریقا، ویسٹ انڈیز سمیت سات ٹیموں نے شرکت کی تصدیق کردی ہے،دیگر تین ممالک کی تصدیق بھی جلد ہو جائے گی۔
