حکومت کو اپوزیشن سے کوئی خطر ہ نہیں، ووٹ کو عزت دو کا کھوکھلا نعرہ اپنی موت آپ مر چکا: عثمان بزدار

       لاہور(نمائندہ خصوصی) وزیراعلیٰ پنجاب سردار عثمان بزدار نے کہا ہے کہ وزیراعظم عمران خان کی قیادت میں ترقی کے جاری سفر میں کسی کو حائل نہیں ہونے دیں گے۔ بد قسمتی سے پی ڈی ایم نے قومی مفادات کو بالائے طاق رکھا ہواہے۔حکومت کو اپوزیشن سے کوئی خطرہ نہیں۔ووٹ کو عزت دو کا کھوکھلا نعرہ اپنی موت آپ مرچکا ہے۔ملک کی ترقی کو روکنے کی ہر کوشش ناکام رہے گی۔ وزیراعظم عمران خان کی قیادت میں تحریک انصاف کی حکومت کو 5 برس کا مینڈیٹ ملا ہے۔ انہوں نے کہا کہ منفی سیاست کا جواب ہمیشہ عوامی خدمت سے دیا ہے۔تحریک انصاف کے دور میں ملک پائیدار ترقی کی جانب گامزن ہے اور ساڑھے 3 برس میں عوام کی فلاح و بہبود کیلئے بے شمار اقدامات کئے ہیں۔  سردار عثمان بزدار نے کہا ہے کہ اپوزیشن رہنماؤں نے ہمیشہ قومی اتحاد اور یکجہتی کو نقصان پہنچانے کی کوشش کی۔ موجودہ حالات کو پس پشت ڈال کراپوزیشن نے منفی سیاست کی اور اپنی ساکھ کو تباہ کیا۔ پاکستان کو اس وقت اتحاد کے ذریعے ہی آگے لے جایا جاسکتا ہے۔ وطن کی مٹی ہم سے ذاتی اختلافات چھوڑ کر ایک ہونے کا تقاضا کررہی ہے۔ انہوں نے کہا کہ بد قسمتی سے اپوزیشن قومی یکجہتی کے منافی ایجنڈا لے کر چل رہی ہے۔ اپوزیشن صرف انتشار پھیلا کر ترقی کے سفر کو روکنے کے درپے ہے۔انہیں پتہ ہے کہ وزیراعظم عمران خان کو عوام کی حمایت حاصل ہے اور 2023 کے بعد بھی عوام کی حمایت سے تحریک انصاف دوبارہ اقتدارمیں آئے گی۔ وزیراعلیٰ عثمان بزدار نے کہا کہ پاکستان کے 22کروڑ عوام کو وزیراعظم عمران خان کی شفاف قیادت پر پورا اعتماد ہے۔ وزیراعظم عمران خان ملک کو درپیش اندرونی و بیرونی چیلنجز کاپامردی سے مقابلہ کررہے ہیں۔ انہوں نے کہا کہ پی ٹی آئی کی حکومت عوامی خدمت اور قومی ترقی کے مشن پر عمل پیرا ہے۔سردار عثمان بزدار نے ویلنشیا ٹاؤن میں گھر سے ملازمہ کی لاش ملنے کے واقعہ کا نوٹس لیتے ہوئے سی سی پی او لاہور سے رپورٹ طلب کر لی ہے۔ وزیراعلیٰ عثمان بزدار نے واقعہ کی انکوائری کا حکم دیتے ہوئے کہا کہ ملزمان کے خلاف قانون کے مطابق کارروائی کی جائے اور متاثرہ خاندان کو انصاف کی فراہمی یقینی بنائی جائے۔ سردار عثمان بزدار نے بخار کی میڈیسن کی قلت کے حوالے سے میڈیا پر نشر ہونے والی خبر کا نوٹس لیتے ہوئے سیکرٹری صحت سے رپورٹ طلب کر لی ہے۔ وزیراعلیٰ عثمان بزدار نے حکم دیا ہے کہ بخار کی میڈیسن کی میڈیکل سٹورز پر دستیابی یقینی بنائی جائے اور محکمہ صحت میڈیسن کی دستیابی یقینی بنانے کیلئے ہر ممکن اقدام کرے۔ انہوں نے کہا کہ مینوفیکچرز سے رابطہ کر کے میڈیسن کی پروڈکشن بڑھائی جائے۔
عثمان بزدار