پنجاب فوڈ اتھارٹی کی طرف سے کوکنگ آئل اور گھی سیمپل مہم جاری

پنجاب فوڈ اتھارٹی کی طرف سے کوکنگ آئل اور گھی سیمپل مہم جاری

لاہور (کامر س رپورٹر)پنجاب فوڈ اتھارٹی کی طرف سے کوکنگ آئل اور گھی سیمپل مہم جاری ہے جس کے تحت تمام کمپنیوں کے مارکیٹ میں فروخت ہونیوالے برانڈز کے سیمپل لے کر لیبارٹری تجزیے کے لیے بھجوائے جا رہے ہیں۔لیبارٹری تجزیے کے نتائج کی روشنی میں معیار پر پورا اترنے والی پروڈکٹس کو مارکیٹ میں فروخت کی اجازت ہوگی جبکہ باقی کی فروخت بند کر دی جائے گی۔ تاہم تازہ ترین صورت حال کے مطابق مارکیٹ میں فروخت ہونے والے250کے قریب پراڈکٹس میں سے 145 کمپنیوں کا مال مارکیٹ سے غائب ہے اور پنجاب فوڈ اتھارٹی کی کوشس کے باوجود مارکیٹ سے ان کے سیمپل دستیاب نہیں ہو سکے ہیں۔250 کے قریب کمپنیوں میں سے اب تک 105 کمپنیوں کے سیمپل اکٹھے کیے جا سکے ہیں۔اس حوالے سے ڈی جی فوڈ اتھارٹی نورالامین مینگل کا کہنا تھا کہ پنجاب فوڈ اتھارٹی جن کمپنیوں کے سیمپل اکٹھے کر چکی ہے ان کے نام اخبار میں مشتہر کر دیے گئے ہیں اور باقی تمام کمپنیوں کو 7 دن کی مہلت دی گئی ہے۔ اخباری اشتہار کے علاوہ بناسپتی گھی اور کوکنگ آئل کمپنیوں کی نمائندہ تنظیم پاکستان وناسپتی مینو فیکچرر ایسوسی ایشن ( پی وی ایم اے) کو بھی مطلع کر دیا گیا ہے کہ 7 دن میں مارکیٹ میں جن کمپنیوں کامال دستیاب نا ہوا ان کا سیمپل فیل تصور کرتے ہوئے انکی فروخت پنجاب میں بند کر دی جائے گی۔علاوہ ازیں جن کمپنیوں کے سیمپل آ چکے ہیں ان کے تجزیے کے بعد فیل ہونے والوں کی فروخت بند کرنے کے علاوہ عوامی آگاہی کے لیے ان کے نام بھی مشتہر کیے جائیں گے۔اس حوالے سے پاکستان وناسپتی مینو فیکچرر ایسوسی ایشن کے عہدے دار عمر اسلام نے بتایا کہ جن کمپنیوں کا مال مارکیٹ میں دستیاب نہیں ان کو مطلع کر دیا گیا ہے کہ اپنی مصنوعات کی مارکیٹ میں موجودگی عمل میں لاکر ڈسٹری بیوٹرزکی تفصیلات پنجاب فوڈ اتھارٹی کو پہنچائیں اور سیمپل کی دستیابی یقینی بنائیں ۔ اگر سیمپل کی دستیابی نا کی گئی تو پنجاب فوڈ اتھارٹی کے اقدامات کی مکمل حمایت کی جائے گی۔

مزید : صفحہ آخر