استاد کی تکریم، خراج عقیدت پیش کرنے کے لیے طلباء کی طویل قطار

استاد کی تکریم، خراج عقیدت پیش کرنے کے لیے طلباء کی طویل قطار
 استاد کی تکریم، خراج عقیدت پیش کرنے کے لیے طلباء کی طویل قطار

  

قاہرہ(مانیٹرنگ ڈیسک)پسندیدہ استاد کے چلے جانے یا فوت ہونے پر طلباء کو دکھ ضرور پہنچتا ہے مگر مصرمیں ایک شفیق استاد کی فوتگی کے بعد اسے خراج عقیدت پیش کرنے کے لیے اسکول کے طلباء نے ایک کلومیٹر طویل قطار بنا کر اپنے استاد کوخراج عقیدت پیش کیا۔العربیہ ڈاٹ نیٹ کے مطابق استاد کی منفرد تکریم کا یہ مظاہرہ واقعہ الشرقیہ گورنری کے شنبار المیمونہ اسکول کے طلباء کی جانب سے کیا گیا۔ جب اسکول کے ایک استاد کو تدفین کے لیے لے جایا جانے لگا تو سڑک کے دونوں کناروں پر طلباء نے ایک کلومیٹر طویل قطار بنا کر اپنے استاد عطیہ عبدالطیف ہاشم کو خراج عقیدت پیش کیا۔ شاگردوں اور دوسرے طلباء کی جانب سے اپنے استاد کی تکریم کا یہ مظاہرہ مقامی لوگوں کے لیے بھی حیران کن تھا۔ لوگوں نے اسے بہت پسند کیا اور طلباء اس اسکول انتظامیہ کی تعریف کی۔اس موقع پر طلباء کا کہنا تھا کہ ان کے استاد عبدالطیف ہاشم نے دوران تدریس اپنی محبت، عطاء اور علم سکھانے میں ذرا برابر بھی کسی قسم کے بخل کا مظاہرہ نہیں کیا۔ طلباء بھی شفیق اور باصلاحیت استاد سے بہت محبت کرتے تھے۔ ان کی اچانک وفات کی خبر نے اسکول کے تمام طلباء کو دکھی کیا ہے۔ اس لئے تمام طلباء نے دنیا سے رخصت ہونے والے استاد کی تکریم کے لیے صف بنا کر انہیں الوداع کیا۔فوت ہونے والے مصری استاد کے ساتھی اساتذہ کا کہنا ہے کہ ہاشم ریاضی کے استاد تھے۔ وہ اپنے شاگردوں سے اپنی اولاد کی طرح محبت کرتے تھے۔ وہ بچوں کی پڑھائی کے معاملے میں ان کے گھروں تک جاتے، والدین سے ملتے اور ان سے بچوں کے روز مرہ تدریسی امور پر والدین کو مطمئن کرتے تھے۔

مزید : صفحہ اول