یمنی فوج کا تعز میں حوثیوں کے زیر قبضہ جمہوری محل پر دھاوا 18باغی ہلاک
صنعاء(این این آئی)یمن کی قومی فوج نے جنوب مغربی شہر تعز میں حوثی باغیوں کے زیر قبضہ ری پبلکن (جمہوری) محل پردھاوا بول دیا اور اس کے مغربی جانب واقع بیشتر علاقے پر قبضہ کر لیا ۔ لڑائی میں اٹھارہ حوثی جنگجو مارے گئے ،میڈیارپورٹس کے مطابق یمنی صدر عبد ربہ منصور ہادی کی وفادار فورسز نے دوروز قبل تعز میں حوثی باغیوں کے زیر قبضہ تزویراتی اہمیت کے حامل اس جمہوری محل کے خلاف نئی کارروائی کا آغاز کیا تھا۔ تب سے ان کی حوثی باغیوں کے ساتھ شدید جھڑپیں جاری ہیں۔تعز کے شہری ذرائع نے بتایا کہ مسلح افواج نے اس محل کے آس پاس واقع تزویراتی اہمیت کے حامل علاقوں پر دوبارہ کنٹرول حاصل کر لیا اور لڑائی میں اٹھارہ حوثی جنگجو مارے گئے ۔قبل ازیں تعز میں یمنی فوج کے کمانڈر میجر جنرل خالد فضل نے ایک بیان میں اس بات کی تصدیق کی تھی کہ ان کی فورسز ری پبلکن محل پر مکمل قبضے سے چند میٹر کی دوری پر ہیں۔