موٹر سائیکل چوری اور اسلحہ کی نوک پر راہزنی کرنیوالے دو ملزمان گرفتار

موٹر سائیکل چوری اور اسلحہ کی نوک پر راہزنی کرنیوالے دو ملزمان گرفتار

  

پشاور(کرائم رپورٹر) کیپٹل سٹی پولیس پشاور نے دو مختلف کاروائیوں کے دوران اسلحہ کی نوک پر راہزنی اور گھروں کے سامنے سے موٹر سائیکل چوری کرنے والے دو ملزمان کو گرفتار کر لیا، تھانہ آغا میر جانی شاہ اور تھانہ گلبہار پولیس کی جانب سے گرفتار ہونے والے ملزمان نے ابتدائی تفتیش کے دوران راہزنی اور موٹر سائیکل چوری کے متعدد وارداتوں میں ملوث ہونے کا اعتراف کر لیا ہے جن کے قبضے سے مختلف وارداتوں کے دوران چھینے گئے 4 عدد موبائل فونز اور گھروں کے سامنے سے دو عدد مسروقہ موٹر سائیکل بھی برآمد کر لئے گئے ہیں، ملزمان سے دوران تفتیش مزید اہم اور سنسنی خیز انکشافات کی توقع کی جا رہی ہے۔تفصیلات کے مطابق ایس ایچ او تھانہ گلبہار احمد اللہ نے ڈی ایس پی گلبہار سجاد حسین کی نگرانی میں خفیہ اطلاع ملنے پر سنگین واردات کی غرض سے موجود مسلح ملزم صدام ولد محمد عمر سکنہ کریم پورہ کو گرفتار کیا، ملزم صدام کا تعلق خطرناک راہزن گروہ سے ہے جس نے ابتدائی تفتیش کے دوران راہزنی کے متعدد وارداتوں میں ملوث ہونے کا اعتراف کر لیا ہے جس کے قبضہ سے مختلف وارداتوں کے دوران چھینے گئے چار عدد موبائل فونز اور ایک موٹر سائیکل بھی برآمد کر لیا گیا ہے۔اسی طرح ایک اور کامیاب کارروائی کے دوران مدعی فضل ولد نیک محمد سکنہ رشید گڑھی کی رپورٹ پر ایس ایچ او تھانہ آغا میر جانی شاہ عمران الدین نے ڈی ایس پی سبرب اختراز خان کی سربراہی میں کامیاب کاروائی کے دوران ملزم شعیب ولد باچا سکنہ رشید گڑھی کو گرفتار کیا ہے جس نے ابتدائی تفتیش کے دوران گھروں کے سامنے متعدد موٹر سائیکل چوری کرنے کا اعتراف کر لیا ہے جس کے قبضے سے ایک مسروقہ موٹر سائیکل بھی برآمد کر لیا گیا، گرفتار دونوں ملزمان سے دوران تفتیش مزید سنسنی خیز اور اہم انکشافات کی توقع کی جا رہی ہے۔

مزید :

پشاورصفحہ آخر -