تھرپارکر،گوادر کے اضلاع میں تیز رفتار انٹرنیٹ کیلئے 2منصوبے شروع کئے ہیں:امین الحق

تھرپارکر،گوادر کے اضلاع میں تیز رفتار انٹرنیٹ کیلئے 2منصوبے شروع کئے ...

  

       اسلام آباد (این این آئی)وفاقی وزیر برائے آئی ٹی اور ٹیلی کمیونیکیشن سید امین الحق نے کہا ہے کہ وزارت آئی ٹی اور ٹیلی کمیونیکیشن نے تھرپارکر اور گوادر کے اضلاع میں موبائل اور تیز رفتار انٹرنیٹ خدمات کی فراہمی کیلئے ایک ارب روپے کے مزید دو منصوبے شروع کیے ہیں اپنے بیان میں کہا کہ ہم سندھ کے شہری اور دیہی علاقوں کے لیے بغیر کسی امتیاز کے براڈ بینڈ، او ایف سی اور دیگر کنیکٹیویٹی پروجیکٹس کو مسلسل جاری کر رہے ہیں، تھرپارکر ضلع کیلئے 870 ملین روپے کا منصوبہ 18 ماہ میں مکمل کیا جائے گا اور 10,432 مربع کلومیٹر کے رقبے پر پھیلے مختلف غیر محفوظ دیہاتوں کے 72,000 سے زائد رہائشیوں کو موبائل اور براڈ بینڈ کی سہولیات فراہم کی جائیں گی۔سید امین الحق نے کہا کہ بلوچستان کے گوادر کے 19 دیہات میں 15000 سے زائد لوگوں کیلئے 188.1 ملین روپے کی لاگت سے براڈ بینڈ پراجیکٹ کی بھی منظوری دی گئی ہے  ان منصوبوں کی تکمیل سے بلوچستان اور سندھ کے دور دراز علاقوں کے مکینوں کو نہ صرف ڈیجیٹل دنیا سے جڑنے کا موقع ملے گا بلکہ وہ اپنے روزمرہ کے معمولات میں بھی سہولتیں تلاش کر سکیں گے۔انہوں نے یو ایس ایف کے بورڈ آف ڈائریکٹرز، اس کے چیئرمین ایڈیشنل سیکرٹری محسن مشتاق چاندنا اور سی ای او حارث محمود چوہدری کو ان منصوبوں کے آغاز پر مبارکباد دی۔انہوں نے کہا کہ یو ایس ایف کو توسیع دینے والے کنیکٹیویٹی نیٹ ورک کے تحت ملک کے براڈ بینڈ خدمات کی فراہمی کے منصوبوں کے ساتھ یو ایس ایف کی کارکردگی کو عالمی سطح پر سراہا جا رہا ہے۔

امین الحق

مزید :

صفحہ آخر -