یروشلم(ڈیلی پاکستان آن لائن )اسرائیل نے 3 اسرائیلی قیدیوں کی رہائی کے بدلے جیلوں میں قید 183 فلسطینی رہا کردیئے۔
نجی ٹی وی "جیو نیوز "کے مطابق غزہ معاہدے کے تحت قیدیوں کے تبادلے کا پانچواں مرحلہ آج مکمل ہوگیا۔مقبوضہ فلسطین کی مزاحمتی تنظیم حماس نے 3 اسرائیلی قیدیوں کو دیر البلاح سے رہا کیا۔
حماس نے 56 سالہ اوہاد بن ایمی، 52 سالہ ایلی شرابی اور 34 سالہ اور لیوی کو رہا کیا جنہیں خصوصی طور پر بنائے گئے سٹیج پر لایا گیا جس کے بعد انہیں ریڈ کراس کی کمیٹی کے سپرد کیا گیا۔
اسرائیل نے بھی جیلوں میں قید 183 فلسطینی قیدیوں کو رہا کردیا جن میں 18 ایسے قیدی شامل ہیں جو عمر قید اور 54 لمبی قید کی سزا کاٹ رہے تھے۔
مقبوضہ مغربی کنارے پہنچنے پر فلسطینیوں قیدیوں کا والہانہ استقبال کیا گیا اور پھولوں کی پتیاں نچھاور کی گئیں۔
اسرائیل عقوبت خانوں میں برسوں سے قید اپنے پیاروں سے ملنے پر رقت آمیز مناظر بھی دیکھے گئے۔
اسرائیلی فوج کے تشدد سے زخموں سے چور اور خرابی صحت پر 7 فلسطینی قیدیوں کو فوری ہسپتال منتقل کیا گیا۔ اسرائیلی جیلوں سے رہا ہونے والے 183 میں سے 111 فلسطینیوں کو غزہ پہنچایا گیا جہاں ان کے عزیز و اقارب نے والہانہ استقبال کیا۔