لاہور(ڈیلی پاکستان آن لائن)پاکستانی اداکار فیروز خان کی لاہور میں ہونے والی پریس کانفرنس میں دیر سے پہنچنے پر خاتون صحافی کے ساتھ تیز جملوں کا تبادلہ ہوا، جس کی ویڈیو سوشل میڈیا پر وائرل ہو گئی۔
فیروز خان پاکستانی ڈرامہ انڈسٹری کے معروف اداکار ہیں اور ان کی شخصیت اور نجی زندگی ہمیشہ ہی میڈیا کی توجہ کا مرکز رہتی ہے۔ ان کی فین فالوونگ بھی بہت بڑی ہے، لیکن حالیہ دنوں میں وہ ایک غیر پیشہ ورانہ رویئے کی وجہ سے تنازعات کا شکار ہو گئے ہیں۔
فیروز خان کو لاہور میں ڈیجیٹل کانٹینٹ کریئٹر رحیم پردیسی کے ساتھ باکسنگ میچ کے حوالے سے پریس کانفرنس میں شرکت کرنا تھی، لیکن وہ اڑھائی گھنٹے دیر سے پہنچے، جس کی وجہ سے تمام شرکا ءکو ان کا انتظار کرنا پڑا۔ اس تاخیر پر لاہور کی صحافی عنبرین فاطمہ نے انہیں کھل کر تنقید کا نشانہ بنایا۔
عنبرین فاطمہ نے کہا کہ، ہمیں سختی سے ہدایت دی گئی تھی کہ وقت پر پہنچیں، ہم سب وقت پر یہاں پہنچے لیکن فیروز خان اڑھائی گھنٹے دیر سے پہنچے۔ آپ لوگ صرف مداحوں اور میڈیا کی حمایت کی وجہ سے سٹار بنتے ہیں۔اس پر فیروز خان نے جواب دیا کہ ”میڈیا سٹار بناتا ہے؟ میڈیا تو پچھلے3 سال سے میرے پیچھے پڑا ہے۔“
خاتون صحافی نے اس پر کہا کہ ”میڈیا ہی آپ کو سپورٹ اور پروموٹ کرتا ہے اور اب پچھلے اڑھائی گھنٹے سے یہاں انتظار کر رہا ہے۔“
فیروز خان نے اپنی تاخیر کی وجہ بتاتے ہوئے کہا کہ ”میرے گھر میں گرم پانی نہیں آ رہا تھا“، جس پر صحافی نے انہیں جواب دیا کہ “یہ مذاق نہیں ہے، اڑھائی گھنٹے انتظار کروانا کوئی طریقہ نہیں ہے۔
یہ واقعہ سوشل میڈیا پر وائرل ہو گیا، جہاں صارفین نے فیروز خان کے غیر پیشہ ورانہ رویئے کی مذمت کی۔ ان کا کہنا تھا کہ فیروز خان کو فوری طور پر معافی مانگ کر مسئلہ حل کر لینا چاہیے تھا، لیکن انہوں نے بحث بڑھا کر معاملہ مزید پیچیدہ کیا۔