اسلام آباد (ڈیلی پاکستان آن لائن)وزیراعظم شہباز شریف کے سامنے متحدہ قومی موومنٹ ( ایم کیو ایم) وفد نے اپنے مطالبات رکھ دیے۔
روزنامہ جنگ کا ذرائع کے مطابق بتانا ہے کہ ملاقات میں ایم کیو ایم کے فاروق ستار، امین الحق اور گورنر سندھ کامران ٹیسوری، حکومت کی طرف نائب وزیراعظم اسحاق ڈار، رانا ثناء اللّٰہ، احسن اقبال اور وفاقی وزیر قانون موجود تھے۔ملاقات میں حکومت کی مجوزہ آئینی ترمیم پر بات چیت ہوئی، اس بارے میں مزید بات چیت پر اتفاق کیا گیا۔
ذرائع کے مطابق دوران گفتگو ایم کیو ایم وفد نے آئینی ترمیم کی حمایت کےلیے ملک بھر کے بلدیاتی اداروں کےلیے اختیارات مانگ لیے۔
ایم کیو ایم وفد نے مطالبہ رکھا کہ بلدیاتی اداروں کو بااختیار بنانے سے متعلق ہمارے مسودے کو ترمیم کا حصہ بنایا جائے۔
ذرائع کے مطابق ایم کیو ایم نے آرٹیکل 140 اے کی ترمیم سے متعلق جمع شدہ مسودہ وزیراعظم کو پیش کردیا۔
آئینی ترمیم، اسحاق ڈار نے ایم کیو ایم کو اعتماد میں لے لیا
وزیراعظم شہباز شریف نے اسحاق ڈار، سپیکر ایاز صادق، احسن اقبال، رانا ثناء اور سعد رفیق کو مشاورت کےلیے ذمے داری سونپ دی ہے۔
ذرائع کے مطابق حکومتی وفد کل ایم کیو ایم قیادت سے ملاقات کےلیے کراچی پہنچے گا اور اس معاملے پر ن لیگ کا وفد نائب وزیراعظم سینیٹر اسحاق ڈار کی سربراہی میں ایم کیو ایم کے مرکز بہادرآباد آئے گا۔
ذرائع کے مطابق ایم کیو ایم اور حکومتی وفد کی ملاقات میں بلدیاتی اداروں سے متعلق مسودے پر گفتگو کی جائے گی، ن لیگی وفد کل حکومتی اتحاد جماعت کی قیادت کو اعتماد میں لے گا۔