لاہور (ڈیلی پاکستان آن لائن)پاکستان کے نامور اداکار احد رضا میر کی سجل علی سے متعلق کی جانے والی مختصر گفتگو سوشل میڈیا کی زینت بنی ہوئی ہے۔
نجی ٹی وی ایکسپریس نیوز کے مطابق احد اور سجل شوبز انڈسٹری میں سب سے زیادہ پسند کی جانے والی جوڑی رہ چکی ہے، ان کی شادی کووڈ لاک ڈاؤن سے قبل14 مارچ 2020 کو ابو ظہبی میں ہوئی تھی۔
بعدازاں 2021 اور 2022 سے ہی یہ خبریں آنا شروع ہوگئیں کہ دونوں میں طلاق ہوچکی ہے۔احد رضا اور سجل علی کی طلاق سے متعلق شوبز کے معروف صحافیوں نے تصدیق کی، اس کے علاوہ کئی نامور لوگوں نے مداحوں سے اپیل بھی کی تھی کہ اس مشکل وقت میں دونوں کو اکیلا چھوڑ دیں اور ان سے متعلق سوشل میڈیا پر پوسٹیں شیئر نہ کریں۔
تاہم اداکار جوڑے کی جانب سے اپنی طلاق کی نہ ہی تصدیق اور نہ ہی تردید کی گئی جب کہ ذرائع کا کہنا ہے کہ جوڑے کی طلاق ہوچکی ہے۔اب حال ہی میں احد رضا میر کی ایک ویڈیو سامنے آئی ہے جس میں انہوں نے سجل کا نام لے کر ان کے کام کی تعریف کی ہے، ساتھ ہی اداکار نے رمشا خان اور دنانیر مبین کے کام کو بھی سراہا۔
احد نے ایک سوال کے جواب میں کہا کہ 'دنانیر، سجل اور رمشا تینوں ہی بہترین اداکارائیں ہیں، میرے ان سب کے ساتھ مختلف تجربات رہے ہیں'۔
واضح رہے کہ احد اور سجل ماضی میں معروف ڈراموں میں اداکاری کے جوہر دکھا چکے ہیں۔