واشنگٹن (ڈیلی پاکستان آن لائن) دوسری جنگ عظیم لڑنے اور امریکی فوج میں لگ بھگ تین دہائیاں گزارنے والے 100 سالہ سابق فوجی نے ایک جملے میں لمبی عمر کا راز بتا دیا۔
فاکس نیوز کے مطابق امریکی ریاست فلوریڈا کے شہر اورلینڈو میں ڈزنی ورلڈ کے میجک کنگڈم پارک میں ایک خصوصی تقریب کے دوران دوسری جنگ عظیم کے 100 سالہ سابق فوجی کرنل ولیم بل اے کونیلی کو خراج تحسین پیش کیا گیا۔ یہ تقریب پرچم اتارنے کے دوران منعقد ہوئی جہاں کونیلی نے امریکی پرچم کو سلامی دی۔ یہ وہی پرچم تھا جو سابق امریکی صدر جمی کارٹر کی موت کے احترام میں سرنگوں کیا گیا تھا اور بعد میں اتار کر کونیلی کو پیش کیا گیا۔
تقریب کے بعد ڈزنی کے عملے نے کونیلی سے ملاقات کی اور ان سے ہاتھ ملایا، لیکن ایک منفرد منظر اس وقت دیکھنے میں آیا جب پارک کے دیگر وزیٹرز بھی ان سے ان کی خدمات پر شکریہ ادا کرنے کے لیے قطار میں کھڑے ہو گئے۔ کونیلی نے تقریب کے بعد خوشی کا اظہار کرتے ہوئے کہا کہ انہیں بہت اچھا محسوس ہوا۔ کونیلی اور ان کا خاندان ڈزنی کے بڑے مداح ہیں، اور ان کا داماد ڈزنی کا ملازم بھی ہے۔ جب ان سے لمبی عمر کا راز پوچھا گیا تو انہوں نے مسکراتے ہوئے کہا، "آپ کے ارد گرد خوش باش لوگ ہونے چاہئیں۔"
کونیلی 18 سال کی عمر میں فوج میں شامل ہوئے۔ وہ دوسری جنگ عظیم کے دوران نارمنڈی کے اوماہا بیچ پر ڈی ڈے کی مشہور جنگ کا حصہ تھے۔اپنی فوجی خدمات کے دوران کونیلی نے یورپ اور بحرالکاہل کے محاذوں پر خدمات انجام دیں اور 27 سال فوج میں گزارے۔ انہیں میدان جنگ میں بہترین خدمات پر "برانز سٹار" سے نوازا گیا۔ کونیلی کا زیادہ تر فوجی کیریئر "کاؤنٹر انٹیلی جنس کور" کے ساتھ گزرا۔