لاہور(ڈیلی پاکستان آن لائن)قومی ٹیم کے سابق کپتان اور سوئنگ کے سلطان وسیم اکرم نے بھی پی سی بی کی پاکستانی کرکٹ کی تاریخ پر مبنی ویڈیو سے عمران خان کو نکالے جانے پر حیرانی کا اظہار کیا ہے۔
ایک سوشل میڈ یا پوسٹ میں ان کاکہنا تھا کہ میں نے پاکستانی کرکٹ تاریخ کے حوالے سے پی سی بی کی ویڈیو دیکھی جس میں عمران خان کو نہیں دکھا یا گیا۔ وسیم اکرم نے کہا کہ سیاسی اختلافات ایک طرف رکھیں ، عمران خان دنیائے کرکٹ کی معروف شخصیت ہے جنہوں نے اپنے وقت میں مضبوط ٹیم کی بنیاد رکھی اور ہمیں مستقبل بھی دکھا یا۔ پی سی بی کو ویڈیو ڈیلیٹ کر کے معافی مانگنی چاہیے۔
پی سی بی کی جانب سے 14 اگست کو سوشل میڈیا پر ایک ویڈیو شیئر کی گئی جس میں 1952 سے لے کر موجودہ وقت تک کے کرکٹ سے متعلق تاریخی اور یادگار واقعات کے مناظر دکھائے گئے۔لیکن اس پوری ویڈیو میں 1992 میں پاکستان کے لیے واحد کرکٹ ورلڈ کپ جیتنے والے کپتان عمران خان ہی غائب تھے جس پر صارفین نے پی سی بی کو آڑے ہاتھوں لیا اور عمران خان کی غیر موجودگی کا گِلہ بھی کیا۔