پشاور(ڈیلی پاکستان آن لائن)محکمہ ابتدائی اور ثانوی تعلیم خیبرپختونخوا نے سکولوں میں موسم سرما کی تعطیلات کا اعلان کردیا۔اعلامیے کے مطابق میدانی علاقوں میں موسم سرما کی تعطیلات 22 دسمبر سے 31 دسمبر تک ہوں گی جبکہ پہاڑی علاقوں میں 22 دسمبر سے 28 فروری 2025 تک سکول بند رہیں گے۔
دوسری جانب بلوچستان کے تعلیمی اداروں میں موسم سرما کی تعطیلات کا اعلان کردیا گیا۔ محکمہ تعلیم بلوچستان کی جانب سے جاری کردہ نوٹی فکیشن کے مطابق بلوچستان کے سرد علاقوں کے تعلیمی اداروں میں سولہ دسمبر سے لیکر اٹھائیس فروری تک چھٹیاں ہوں گی جبکہ بلوچستان کے گرم علاقوں کے سکولوں کو یکم جنوری سے دس جنوری تک بند رکھا جائے گا۔اس سے قبل پنجاب بھر کے پرائیویٹ و سرکاری سکولوں میں موسم سرما کی چھٹیوں کا اعلان کیا گیا تھا۔
پنجاب بھر کے سکولوں میں 20 دسمبر سے موسم سرما کی چھٹیوں کا آغاز ہوگا اور چھٹیوں کا سلسلہ 10 جنوری 2025 تک جاری رہےگا، اس سال سکولوں میں موسم سرما کیلئے 20 دن کی چھٹیاں ہوں گی۔محکمہ تعلیم سندھ نے بھی سکولوں اور کالجوں میں موسم سرما کی تعطیلات کا اعلان کردیا ہے، صوبے کے تمام سرکاری اور نجی اسکول 22 دسمبر 2024 سے 31 دسمبر 2024 تک بند رہیں گے۔