عالمی شہرت کے حامل کئی بین الاقوامی کرکٹرز نے 2024ء میں اپنے کیریئر کا آخری میچ کھیلا اور کرکٹ کو خیر باد کہہ دیا۔ٹیسٹ کرکٹ میں بطور فاسٹ باؤلر سب سے زیادہ 704 وکٹیں لینے والے 42 سالہ انگلینڈ کے جیمز اینڈرسن نے گزشتہ سال مئی میں انٹرنیشنل کرکٹ سے ریٹائرمنٹ کا اعلان کیا۔جیمز اینڈرسن نے 188 ٹیسٹ، 194 ایک روزہ اور 19 ٹی ٹونٹی میچز کھیلے۔اگست میں بھارتی اوپنر شیکھر دھون نے 38 سال کی عمر میں انٹرنیشنل اور ڈومیسٹک کرکٹ کو الوداع کہہ دیا۔ دھون 2013ء میں چیمپئنز ٹرافی کی فاتح ٹیم کا نہ صرف حصہ تھے بلکہ مین آف دا ٹورنامنٹ کا بھی ایوارڈ جیتا تھا۔اگست میں انگلینڈ کے بائیں ہاتھ کے بیٹر ڈیوڈ مالان نے 37 سال کی عمر میں انٹرنیشنل کرکٹ کو خیرباد کہہ دیا۔ ڈیوڈ مالان ٹی ٹوئنٹی رینکنگ میں نمبر ون بیٹر بھی رہ چکے ہیں۔
ویسٹ انڈیز کے دائیں ہاتھ کے 36 سالہ فاسٹ باؤلر شینن گیبریل گزشتہ سال اگست میں انٹرنیشنل کرکٹ سے ریٹائر ہو گئے، انہوں نے 59 ٹیسٹ، 25 ایک روزہ اور 2 ٹی ٹوئنٹی میچز کھیلے۔ آسٹریلیا کے جارحانہ اوپنر ڈیوڈ وارنر نے گزشتہ سال جنوری میں ون ڈے اور ٹیسٹ کرکٹ سے ریٹائرمنٹ کا اعلان کیا تھا تاہم گزشتہ سال جون میں ہونے والے ٹی ٹوئنٹی ورلڈ کپ کے بعد وہ انٹرنیشنل کرکٹ کے تمام فارمیٹ سے بھی ریٹائر ہو گئے۔
جنوبی افریقہ کے پہلے اور پھر نمیبیا کی نمائندگی کرنے والے آل راؤنڈر ڈیوڈ ویزا نے بھی گزشتہ سال ٹی ٹوئنٹی ورلڈ کپ کے بعد تمام بین الاقوامی فارمیٹس سے ریٹائر ہونے کا اعلان کیا تھا۔
نیدر لینڈز کے سیبرانڈ اینگل برکٹ بھی ٹی ٹوئنٹی ورلڈ کپ کے بعد انٹرنیشنل کرکٹ سے ریٹائر ہو گئے تھے۔بھارتی وکٹ کیپر بیٹر دنیش کارتک، بیٹرز سوربھ تیواری، کیدار یادیو، فاسٹ بولر برندر سران نے بھی گزشتہ سال ریٹارمنٹ کا اعلان کیا۔
نیوزی لینڈ کے بائیں ہاتھ کے فاسٹ باؤلر نیل ویگنر نے گزشتہ سال فروری میں آسٹریلیا کے خلاف ہوم ٹیسٹ سیریز سے باہر ہونے کے بعد انٹرنیشنل کرکٹ سے ریٹائرمنٹ کا اعلان کیا تھا۔
علاوہ ازیں جنوبی افریقہ کے سابق کپتان ڈین ایلگر نے بھی 2024ء میں ریٹائرمنٹ لے لی۔
نیوزی لینڈ کے بائیں ہاتھ کے جارحانہ بیٹر کولن منرو نے گزشتہ سال مئی میں انٹرنیشنل کرکٹ سے ریٹائرمنٹ کا باضابطہ اعلان کیا۔یوگنڈا کے کپتان برائن ماسابا نے ٹی ٹوئنٹی ورلڈ کپ کے بعد مختصر ترین فارمیٹ سے ریٹائرمنٹ کا اعلان کیا تھا۔ گزشتہ سال اگست میں صرف 26 سال کی عمر میں آسٹریلوی بیٹر ول پوکوسکی نے کرکٹ کو خیرباد کہہ دیا تھا۔
انگلش آل راؤنڈر معین علی نے گزشتہ سال 8 ستمبر کو بین الاقوامی کرکٹ سے ریٹائرمنٹ کا اعلان کیا۔آسٹریلیا کے بائیں ہاتھ کے وکٹ کیپر بیٹر میتھیو ویڈ نے اکتوبر 2024ء میں انٹرنیشنل کرکٹ سے ریٹائرمنٹ کا اعلان کیا تھا۔گزشتہ سال ٹی ٹوئنٹی ورلڈ کپ سے قبل ریٹائرمنٹ واپس لینے والے عماد وسیم اور محمد عامر نے دسمبر میں دوبارہ انٹرنیشنل کرکٹ سے ریٹائرمنٹ کا اعلان کر دیا۔ بائیں ہاتھ کے طویل القامت پاکستانی فاسٹ باؤلر محمد عرفان نے بھی دسمبر میں ہی انٹرنیشنل کرکٹ سے ریٹائرمنٹ کا اعلان کیا۔بھارت کے سٹار اسپنر روی چندرن ایشون نے 18 دسمبر کو بارڈر گواسکر ٹرافی کے تیسرے ٹیسٹ میچ کے اختتام پر انٹرنیشنل کرکٹ سے ریٹائرمنٹ کا اعلان کیا۔نیوزی لینڈ کرکٹ ٹیم کے فاسٹ باؤلر ٹِم ساؤتھی کا ٹیسٹ کیریئر 17 دسمبر کو انگلینڈ کے خلاف سیریز کے خاتمے کے ساتھ ہی اختتام کو پہنچا۔
جنوبی افریقہ کے جارح مزاج وکٹ کیپر بیٹر ہینری کلاسن نے بھی گزشتہ سال جنوری میں ٹیسٹ کرکٹ سے ریٹائرمنٹ کا اعلان کیا تھا۔
بھارتی سٹار بیٹرز ویرات کوہلی اور کپتان روہت شرما نے جون میں ٹی ٹوئنٹی ورلڈ کپ کا فائنل جیتنے کے بعد پریزینٹیشن سیریمنی کے دوران ٹی ٹوئنٹی فارمیٹ سے ریٹائرمنٹ کا اعلان کیا تھا۔
بنگلہ دیش کے سٹار آل راؤنڈر شکیب الحسن نے بھی ستمبر میں ٹی ٹوئنٹی انٹرنیشنل سے کنارا کشی کرلی تھی جبکہ بنگلہ دیش کے آل راؤنڈر محمود اللہ نے اکتوبر میں ٹی ٹوئنٹی فارمیٹ سے ریٹائرمنٹ کا اعلان کیا۔