جنیوا (ڈیلی پاکستان آن لائن) اقوام متحدہ کے پناہ گزینوں کے سربراہ فیلیپو گرانڈی نے کہا ہے کہ بشار الاسد کے دسمبر کے اوائل میں زوال کے بعد تقریباً دو لاکھ شامی پناہ گزین وطن واپس لوٹ چکے ہیں۔ گرانڈی نے اپنے ایک بیان میں کہا کہ 8 دسمبر سے 16 جنوری کے درمیان تقریباً ایک لاکھ 95 ہزار 200 شامی اپنے گھروں کو واپس لوٹے ہیں۔ یہ اعداد و شمار انہوں نے سوشل میڈیا پلیٹ فارم "ایکس" پر شائع کیے۔
خبر ایجنسی اے ایف پی کے مطابق گرانڈی نے بتایا کہ وہ جلد ہی شام اور اس کے ہمسایہ ممالک کا دورہ کریں گے تاکہ اقوام متحدہ کی ایجنسی یو این ایچ سی آر کی جانب سے واپس لوٹنے والوں اور میزبان کمیونٹیز کی معاونت کو تیز کیا جا سکے۔
خیال رہے کہ شامی شہریوں کی واپسی اس وقت ہوئی جب گزشتہ سال کے اواخر میں اپوزیشن فورسز کے ایک اچانک حملے نے بشار الاسد کو اقتدار سے ہٹا دیا، جس سے 13 سالہ خانہ جنگی کے خاتمے کی امیدیں پیدا ہوئیں۔ اس جنگ میں پانچ لاکھ سے زائد افراد ہلاک ہوئے اور لاکھوں افراد کو اپنا وطن چھوڑنا پڑا۔