تحریر: عمران مقبول
پنجاب کے صحت کے نظام میں بہتری لانے کے لیے حکومت پنجاب نے مختلف اقدامات کیے ہیں جن میں سب سے اہم اقدام صوبے کے بنیادی مراکز صحت بی ایچ یوز (بیسک ہیلتھ یونٹ) کی تعمیر نو ری ویمپنگ کا عمل ہے۔ ان مراکز کا مقصد دیہی اور شہری علاقوں میں عوام کو صحت کی سہولتیں فراہم کرنا ہے تاکہ وہ آسانی سے علاج کی خدمات حاصل کر سکیں۔ یہ مراکز نہ صرف مریضوں کو فوری طبی امداد فراہم کرتے ہیں بلکہ مختلف بیماریوں کی روک تھام اور صحت کے حوالے سے آگاہی دینے کے ساتھ عوام الناس کو طبی سہولیات اُن کے قریب فراہم کرنے کا ایک اہم ذریعہ ہیں۔
صوبے میں صحت کی سہولتوں کی فراہمی کا انحصار بنیادی مراکز صحت پر ہے۔ خاص طور پر دیہی علاقوں میں جہاں لوگوں کو بڑے ہسپتالوں تک پہنچنے میں مشکلات کا سامنا ہوتا ہے۔ ان مراکز کو عام طور پر ابتدائی علاج اور ایمرجنسی کی صورت میں فوری طبی امداد فراہم کرنے کے لیے استعمال کیا جاتا ہے۔ یہ عوام کے لیے پہلا طبی مرکز ہے جہاں وہ بیماریوں کے علاج کے لیے سب سے پہلے رجوع کرتے ہیں۔ ویکسینیشن، ماں اور بچے کی صحت کے پروگرامز، اور عوامی صحت کی آگاہی جیسے اہم کام شامل ہیں۔
پنجاب کے بنیادی مراکز صحت کا انفراسٹرکچر اور اس میں جدت کا عمل صوبے کی صحت کی سہولتوں کو نئے عہد میں لے کر جا رہا ہے۔ وزیرِاعلیٰ پنجاب مریم نواز کی قیادت میں ان مراکز کی تعمیر نو کا عمل تیز کیا گیا۔ جس سے صحت کی خدمات میں معیاری بہتری اور عوام کے لیے سہولتیں بڑھائی جا رہی ہیں۔ یہ منصوبہ نہ صرف عوام کو بہترین صحت کی خدمات فراہم کرنے کی جانب ایک اہم قدم ہے بلکہ پنجاب کے صحت کے نظام میں ایک نیا انقلاب لانے کی غرض سے بھی ایک سنگ میل ثابت ہو گا۔ جدید طرزِ تعمیر اور جدید ٹیکنالوجی کا استعمال ان مراکز کی کارکردگی میں نمایاں اضافہ کرے گا اور عوام کی زندگیوں میں سہولتیں فراہم کرے گا۔
صوبائی حکومت جس انداز میں پنجاب کے انفراسٹرکچر کو جدید سہولتوں سے لیس کر رہی ہے وہ قابلِ ستائش ہے۔ مختلف شعبوں میں جاری منصوبے اور ان کی تکمیل کا عمل بہت حوصلہ افزا ءہے۔ خاص طور پر فیروزوالہ، شامکے بھٹیاں، پھولنگر اور رائے ونڈ میں بنیادی دیہی مراکز صحت کے انفراسٹرکچر کی اپ گریڈیشن کے پائلٹ پروجیکٹ کی کامیابی کے بعد وزیرِاعلیٰ مریم نواز کی ہدایت پر اس منصوبے کا دائرہ کار پورے صوبے میں بڑھایا گیا ہے۔ وزیرِاعلیٰ پنجاب کی کوشش یہ ہے کہ صوبے کے دور دراز علاقوں میں بھی جدید ترین طبی سہولتیں دستیاب ہوں تاکہ عوام کو بہترین صحت کی خدمات اپنے قریب ترین مراکز سے مل سکیں۔
اس ضمن میں صوبہ بھر کے 1236 بنیادی مراکز صحت کی ری ویمپنگ کا عمل شروع کیا گیا ہے جس کے لیے صوبائی حکومت نے 12 ارب روپے کی خطیر رقم مختص کی۔ یہ منصوبہ 23 ستمبر 2024 سے شروع کیا گیا اور اس کی تکمیل 31 دسمبر 2024 تک متوقع ہے۔ اس منصوبے کا مقصد بنیادی مراکز صحت کی عمارتوں کی مرمت اور ان میں جدید طبی آلات کی فراہمی ہے۔تاکہ یہ مراکز جدید طرز پر کام کر سکیں اور عوام کو بہترین طبی سہولتیں فراہم کر سکیں۔ اس کے ساتھ ساتھ ان مراکز میں علاج کی جدید سہولتیں، ایمرجنسی رومز، اور مختلف قسم کی لیبارٹری خدمات بھی فراہم کی جا رہی ہیں۔
محکمہ سی اینڈ ڈبلیو اس پروجیکٹ پر دن رات کام کر رہا ہے اور 31 دسمبر تک تمام 1236 بی ایچ یوز کی تعمیر نو کا عمل مکمل ہونے کی توقع ہے۔ صوبے بھر میں ہزاروں مزدور دن رات ان منصوبوں پر کام کر رہے ہیں، تاکہ اس عمل کی تکمیل جلد از جلد ہو سکے اور عوام کو ان جدید سہولتوں سے فائدہ مل سکے۔ ری ویمپنگ کا یہ عمل ایک ریکارڈ مدت میں مکمل ہونے کے قریب ہے جس کے بعد بوسیدہ عمارتیں جدید کلینک میں تبدیل ہو جائیں گی اور عوام کو ایک نئی اور جدید صحت کی سہولت ملے گی۔
اب تک اس منصوبے کے تحت 772 یونٹس میں بلاسٹرنگ، 384 یونٹس میں فلورنگ اور 74 یونٹس میں فنشنگ کا کام تیزی سے جاری ہے۔ 1236 بی ایچ یوز میں بیک وقت تعمیراتی کام جاری ہے۔ جن میں سنٹرل پنجاب کے 286، زون کے 363 اور جنوبی پنجاب کے 587 مراکز صحت شامل ہیں۔ وسطی پنجاب میں 20 فیصد، شمالی زون میں 28 فیصد اور جنوبی پنجاب میں 25 فیصد تک کام مکمل ہو چکا ہے۔ اس منصوبے کی تکمیل کے بعد پورے صوبے میں بنیادی مراکز صحت کی جدید عمارتیں عوام کے لیے مزید سہولتیں فراہم کریں گی۔
صوبائی وزیرِ تعمیرات و مواصلات ملک صہیب احمد بھرتھ اور صوبائی سیکریٹری سہیل اشرف اس پروجیکٹ کی مانیٹرنگ کر رہے ہیں تاکہ اس منصوبے کو بروقت مکمل کیا جا سکے۔ ان کی کوشش ہے کہ اس منصوبے کو وزیرِاعلیٰ پنجاب مریم نواز کے ویژن اور وعدے کے مطابق مکمل کیا جائے تاکہ عوام کو بہتر صحت کی سہولتیں فراہم کی جا سکیں۔ یہ منصوبہ صرف پنجاب کے عوام کے لیے نہیں بلکہ پورے ملک کے لیے ایک مثال بن سکتا ہے
پنجاب کے بنیادی مراکز صحت انفراسٹرکچر کی اپ گریڈیشن کا کی تعمیر نو کا یہ منصوبہ صوبے کے عوام کے لیے ایک بہت بڑی خوشخبری ہے۔ اس سے نہ صرف عوام کو فوری طبی امداد ملے گی بلکہ ان کے لیے صحت کی جدید سہولتیں بھی میسر آئیں گی۔ اس کے علاوہ اس منصوبے سے صحت کے نظام میں مزید بہتری آئے گی اورمقامی سطح پر صحت کی خدمات کا معیار بلند ہوگا۔ حکومت پنجاب کی اس کاوش کو سراہا جانا چاہیے کیونکہ یہ ایک اہم قدم ہے جو نہ صرف عوام کی صحت کو بہتر بنانے کے لیے اٹھایا گیا ہے بلکہ یہ صوبے میں صحت کے سیکٹر میں انقلاب لانے کا باعث بھی بنے گا۔
نوٹ: ادارے کا لکھاری کی آراء سے متفق ہونا ضروری نہیں