اسلام آباد(ڈیلی پاکستان آن لائن) سوشل میڈیا ایکٹوسٹ صنم جاوید کی بہن فلک جاوید کی بازیابی کے لیے اسلام آباد ہائیکورٹ میں درخواست دائر کر دی گئی۔
نجی ٹی وی چینل دنیا نیوز کے مطابق درخواست فلک جاوید کے والد جاوید اقبال کی جانب سے ایڈووکیٹ میاں علی اشفاق نے دائر کی۔
درخواست میں مؤقف اپنایا گیا ہے کہ فلک جاوید کو عدالت کے سامنے پیش کرنے کا حکم دیا جائے اور ان کے خلاف درج مقدمات کی تفصیلات فراہم کی جائیں۔
درخواست میں عدالت سے استدعا کی گئی ہے کہ کیس کی سماعت آج ہی کی جائے۔
یادرہے کہ فلک جاوید کو اسلام آباد سے گزشتہ روز حراست میں لیے جانے کی اطلاعات تھیں تاہم ان پر کس نوعیت کا مقدمہ قائم کیا گیا ہے یہ تاحال واضح نہیں ۔ مبینہ طورپر گرفتاری سے قبل فلک جاوید نے اپنے شوہر کو اطلاع دی تھی کہ ’’مجھے گرفتار کرنے آئے ہیں‘‘ ، وہ اسلام آباد میں پاکستان تحریکِ انصاف کے چند رہنماؤں کے ہمراہ موجود تھیں اور اسی روز پشاور جلسے کے لیے روانہ ہونا تھا تاہم اسلام آباد پولیس نے اچانک چھاپہ مار کر انہیں مبینہ طورپر اپنی تحویل میں لے لیا۔