اسلام آباد (آئی این پی)وفاقی وزیر برائے آئی ٹی اینڈ ٹیلی کام شیزا فاطمہ نے کہا ہے کہ ملک میں آئی ٹی کا شعبہ تیزی سے ترقی کر رہا ہے، ٹیکنالوجی، ڈیٹا کا استعمال اور ملک میں فری لانسر بڑھ رہے ہیں،ملک پائیدار معاشی استحکام کی طرف گامزن ہے۔ پاکستان سافٹ ویئر ایکسپورٹ بورڈ کے تحت ٹیک انیشیٹیو پروگرام کی افتتاحی تقریب میں وفاقی وزیر نے بطور مہمانِ خصوصی شرکت کی۔ اس موقع پر شیزا فاطمہ خواجہ نے چھ مختلف آئی ٹی پروگرامز کا باضابطہ افتتاح کیا۔ وزیر آئی ٹی نے کہا وزیراعظم کی ہدایت ہے آئی ٹی شعبے میں نوجوانوں کیلئے زیادہ سے زیادہ روزگار کے مواقع پیدا کئے جائیں، کیونکہ ملک کی 60 فیصد آبادی نوجوانوں پر مشتمل اور انکی محنت و صلاحیتوں سے معیشت میں نمایاں اضافہ کیا جا سکتا ہے۔وزیراعظم یوتھ پروگرام کے تحت ملک بھر میں سکولز پروگرام بھی جاری ہیں جبکہ آئی ٹی ایکسپورٹ سیکٹر کیلئے 25 ارب ڈالر کا ہدف مقرر ہے۔ تقریب میں متعارف کرائے گئے پروگرامز میں پرائم منسٹر اسکل ٹیک پاکستان شامل ہے، جسکے تحت نوجوانوں کو ہنر مند اور ٹرینڈ بنایا جائیگا، سکل برج پروگرام کے تحت آئی ٹی انڈسٹری میں نوجوانوں کو انٹرن شپ اور ملازمتیں فراہم کی جائینگی اور رواں سال 9 ہزار طلبہ کو انٹرن شپ دی جائیگی، اسکل لفٹ 1.0 کے ذریعے 18 ہزار نوجوانوں کو مصنوعی ذہانت، سائبر سیکیورٹی اور بلاک چین کی ٹریننگ فراہم کی جائیگی، سافٹ سکلز پروگرام نوجوانوں کیلئے لازمی ہوگا جسکے تحت کمیونیکیشن، فنانشل اور مارکیٹنگ سکلز کیساتھ ساتھ ای میل اور انٹرنیشنل مارکیٹ میں بات چیت کرنے کی تربیت دی جائیگی۔ سرٹیفائی ٹو پروگرام کے تحت ایکسپورٹ کو فروغ دینے کیلئے بین الاقوامی فرمز سے معاہدے اور سرٹیفکیٹ کا اجرا کیا جائیگا۔ مرکز پروگرام کے تحت آئی ٹی کمپنیوں اور اسمال انڈسٹریز کیلئے 24/7 سہولت مرکز قائم ہوگا جو رجسٹریشن، ٹیکسیشن اور شکایات کے ازالے میں مدد فراہم کریگا۔ وزیر آئی ٹی نے کہا کہ سعودی عرب کیساتھ تاریخی معاہدہ ہوا ہے جبکہ ورلڈ بینک اور اے ڈی پی کے تحت بھی پروگرام شروع کئے گئے ہیں، امریکا اور چین کیساتھ تعلقات بہتر ہو رہے ہیں، سب ملکر آئی ٹی انڈسٹری کو فروغ دینے کیلئے کام کر رہے ہیں۔ انہوں نے اس عزم کا اظہار کیا کہ صحت، تعلیم اور زراعت کے شعبوں میں بھی آئی ٹی کے ذریعے بہتری لائی جائیگی۔
شزہ فاطمہ